नेपाली काँग्रेसको १३औं महाधिवेशनको समाचार सङ्कलनका लागि सूचना विभागले जारी गरेको प्रेस पासका आधारमा महाधिवेशनस्थलमा प्रवेश गर्न दिइने व्यवस्था गरिएको छ ।
महाधिवेशन केन्द्रीय प्रचारप्रसार समितिले भोलिदेखि सूचना विभागको प्रेसपासका आधारमा समाचार सङ्कलनका लागि महाधिवेशनस्थलमा प्रवेशको व्यवस्था गरेको हो ।
काँग्रेसले महाधिवेशनका लागि पत्रकारलाई छुट्टै परिचयपत्रको व्यवस्था गरेको भए पनि सहजताका लागि यस्तो व्यवस्था गरिएको प्रचारप्रसार समितिका संयोजक डा मीनेन्द्र रिजालले जानकारी दिनुभयो ।
महाविधेशनको समाचार सङ्कलन तथा संप्रेषणका लागि स्रोतसाधन सम्पन्न छुट्टै मिडिया सेन्टरकोसमेत व्यवस्था गरेको छ । समाचार सङ्कलन केन्द्र तीव्रगतिको इन्टरनेट, १७ वटा नयाँ कम्युटरलगायतका सामग्रीको व्यवस्था गरिएको समाचार सङ्कलन केन्द्र संयोजक कवीर राणाले जानकारी दिनुभयो ।
रासस
