भट्टराईमाथि खनिए दाहाल
एकीकृत नेकपा माओवादीका अध्यक्ष पुष्पकमल दाहालले पार्टी परित्याग गरेर नयाँ शक्ति निर्माणमा जुटिरहेका पूर्वप्रधानमन्त्री डा. बाबुराम भट्टराईमाथि राष्ट्रद्रोहीको गम्भिर आरोप लगाएका छन्।
एमाओवादी अध्यक्ष दाहालले सोमबार पार्टीका करिब २ हजार कार्यकर्ताका सामुन्ने करिब चार दशकसँगै काम गरेका डा. भट्टराईमाथि राष्ट्रद्रोहीको आरोप लगाएका हुन्। एमाओवादीको काठमाडौ जिल्ला समितिले सोमबार प्रज्ञा भवनमा गरेको अगुवा कार्यकर्ता प्रशिक्षण कार्यक्रममा दाहालले डा. भट्टराई पार्टी परित्याग गरेर नयाँ शक्तिमा लाग्नु बुढेसकालमा सम्बन्ध विच्छेद गरेर नयाँ श्रीमती भित्र्याएजस्तै भएको बताए।
डा. भट्टराईले संविधान जारी भएको एक सातापछि गत असोज ९ गते एमाओवादी पार्टी परित्याग गरेका थिए। एमाओवादी अध्यक्ष दाहालले पार्टी परित्याग गरेर डा. भट्टराईले वैचारिक/सैद्धान्तिक अपराध गरेको आरोप लगाए। उनले भट्टराई पीएचडी गरेका आधारमा नभई पार्टीमा गरेको योगदानका आधारमा प्रधानमन्त्री भएको भन्दै भट्टराईलाई बुद्धि नै नभएको नेताको संज्ञा दिए। उनले अहिले गरेको गल्तीको प्रायश्चित गरी भट्टराई भविष्यमा पुनः एमाओवादीमा फर्किने दाबी गर्दै एमाओवादीमा फर्किनुको साटो भट्टराईको स्थिति बलियो भए मुलुक नै सकिने बताए।
डेढ घण्टा लामो मन्तव्यका क्रममा एमाओवादी अध्यक्ष दाहालले कार्यक्रममा उपस्थित कार्यकर्तालाई हँसाउने काम समेत गरे। उनले अभिनेत्री करिष्मा मानन्धरको नाम आफूसँग जोडिएको विषयदेखि संविधानसभाको पहिलो निर्वाचनका बेला एमालेका तत्कालीन महासचिव माधवकुमार नेपालसँग तालमेलका लागि भएका छलफल र चुनावमा प्राप्त परिणामपछि आफू हौसिएको प्रसङ्ग निकालेर कार्यकर्तालाई हँसाएका थिए। उनले पहिलो संविधानसभामा २ सय ४० सीट जित्दा ५ सय सीट जितेजस्तो अनुभव भएको र त्यो घमण्डले सबै पद गुमाउनुपरेको बताए। उनले अहिले सबैभन्दा ठूलो दल काँग्रेसको हालत पनि एमाओवादीको जस्तै भएको बताए।
एमाओवादी अध्यक्ष दाहालले एमालेका तत्कालीन महासचिव माधवकुमार नेपालले २० प्रतिशतभन्दा बढी सीटमा तालमेल गर्न नमानेका कारण एक्लै निर्वाचनमा होमिएको र निर्वाचनमा नसोचेको सीट हात परेपछि कार्यकर्तालाई विर्सेर धर्ती नै छोडेका कारण पार्टी दोस्रो संविधानसभा निर्वाचनमा तेस्रो स्थानमा खुम्चिएको बताए।
एमाओवादी अध्यक्ष दाहालले तेस्रो स्थानमा खुम्चिएपनि मुलुकको साँचो एमाओवादीको हातमा रहेको बताए। उनले मुलुकको साँचो एमाओवादीको हातमा भएकैले संविधान जारी गर्न काँग्रेसलाई सहमत गराउन तथा एमालेलाई प्रधानमन्त्री पद दिलाउन सकेको बताए।
एमाओवादी अध्यक्ष दाहालले दुई वर्षभित्र पार्टीलाई फेरि एक नम्बरको बनाउने लक्ष्यका साथ सुदृढीकरण र पुनर्निमाणको अभियान थालिसकेको भन्दै अहिलेकै अवस्थामा पार्टीले गाउँपालिकादेखि संघसम्म सबै तहका निर्वाचनमा उम्मेद्वार उठाउन पनि नसक्ने बताए।
एमाओवादी अध्यक्ष दाहालले पार्टीलाई सबैभन्दा ठूलो दलका रुपमा उभ्याउनका लागि गणतन्त्र, संघीयता, समानुपातिक÷समावेशी, धर्मनिरपेक्षता जस्ता उपलब्धीका बारेमा जनतालाई जानकारी गराउनुपर्ने बताए। उनले एमाओवादीका कारण नै उल्लेखित उपलब्धि सम्भव भएको भन्दै यस बारेमा जनतालाई राम्रारी बुझाउन सके काँग्रेस र एमाले जनताबाट पत्तासाफ हुने दाबी गरे।
setopati