फाल्गुन १०, २०७२- गोर्खा भूतपूर्व सैनिक संघ (गेसो) ले बेलायत सरकारविरुद्ध अन्तर्राष्ट्रिय अदालत जाने उद्घोष गरेको छ । उसले बेलायत र नेपाल सरकारविरुद्ध मानव तस्करी, गोर्खाको संस्कार संस्कृतिको विनास एवं गोर्खाको सूचना पाउने हक हनन गरिएको ठहर गर्दै अन्तर्राष्ट्रिय अदालतमा मुद्दा उठाउने बताएको हो ।

आइतबार बेलायतको अल्डरसटस्थित किङ्ससेन्टरमा आयोजित एक दिवसीय अभिमुखी कार्यक्रममा गेसोले यसअघि हकहितका लागि लडिसकेको जनाउँदै अब नेपाल र नेपालीको राष्ट्रिय स्वाभिमानको लडार्इं लड्ने प्रतिज्ञा गरेको हो ।

गेसोको यो घोषणा कार्यक्रममा बेलायतका नेपाली विद्वान, बुद्धिजीवी, विभिन्न राजनीतिक पार्टी र जनजाति संगठनका प्रतिनिधि, पत्रकार लगायत सयौं भूपूगोर्खा सैनिक सहभागी थिए ।

कार्यक्रममा गेसो केन्द्रिय सभापति पदमबहादुर गुरुङले १५ पृष्ठ लामो कार्यपत्र प्रस्तुत गर्दै नेपाल बर्बादीको कारण स्वघोषित श्री ३ महाराज र अंग्रेज रहेको दावी गरे । उनले नेपाल कहिल्यै पनि बेलायतको उपनिवेश नरहेको र यस्तो सार्वभौमसत्ता सम्पन्न देशका स्वतन्त्र नागरिकलाई के कस्तो सन्धि सम्झौता गरि बेलायती सेनामा पठाइएको हो सो को सत्यतथ्य बेलायत र नेपाल दुवै सरकारले सार्वजनिक गर्नुपर्ने बताए । गुरुङले बेलायती सेनामा बलजफ्ती लैजाने परम्परा र संस्कारले नेपालको आत्मनिर्भर अर्थतन्त्र, सामाजिक सद्भाव, विशिष्ट मौलिक परम्परा र संस्कृति सबै ध्वस्त भएको जिकिर समेत गरे ।

बेलायतले दुई सय वर्षसम्म गोर्खाहरुलाई पशु सरह व्यवहार गरेर दास बनाएको उल्लेख गर्दै गुरुङले विभिन्न युद्धमा ६० हजारभन्दा बढी मारिएका, लाखौं घाइते र बेपत्ता पारिएकाको आधिकारिक जानकारी बेलायतले नदिएकाले यसमा बेलायत सरकार जवाफदेही हुनुपर्ने बताए । दुई देशबीच कानुनी रुपमा सन्धि सम्झौता गरि वैधानिकता दिएको कतै नपाइएको चर्चा गर्दै सभापति गुरुङले गोर्खाहरुलाई अवैधानिक तवरले युद्धमा लगि हत्या गर्नु सरासर युद्ध अपराध भएको दावी गरे । भेलाले ६ बुँदे लन्डन घोषणापत्र समेत जारी गरेको छ ।