फाल्गुन ४, २०७२- प्रधानमन्त्री केपी शर्मा ओलीले वैशाख १२ गतेको महाभूकम्पले भत्किएको धरहरा पुनर्निर्माणका लागि एक महिनाको तलब दिने घोषणा गरेका छन् ।

सुन्धारास्थित धरहरा क्षेत्रमा मंगलबार भएको ‘ऐतिहासिक धरोहर पुनर्निर्माण संकल्प’मा सम्बोधन गर्दै प्रधानमन्त्रीले एक महिनाको सबै तलब दिने घोषणा गरेका हुन् । ‘धरहरासहित पुरातात्त्विक सम्पदा पुनर्निर्माण नेपालीकै पैसामा हुनेछ,’ प्रधानमन्त्रीले भने, ‘भोलि नै खाता खोल्नुस्, मेरो एक महिनाको तलब म जम्मा गरिदिन्छु ।’

‘आफ्नै सम्पदा, आफ्नै सम्पत्ति, आफैं निर्माण’ भन्ने नाराससहित सम्पदा पुनर्निर्माण अभियान सुरुवात गरिएको हो ।

प्रधानमन्त्रीले धरहरामा सबै नेपालीको लगानी हुने र सबै मृतकको  नाम राखिने जानकारी दिए । उनले धरहरा क्षेत्रमा भूकम्पको स्मारक पनि बनाइने जानकारी दिए । ‘अब धरहरा झन् अग्लो र आधुनिक बन्छ,’ उनले भने, ‘भूकम्प प्रतिरोधी बनाइनेछ ।’

प्रधानमन्त्रीले सम्पदा पुनर्निर्माणमा सरकारको र विदेशीको मुख ताक्न नहुने बताए । ‘धरहरासहित सबै सम्पदाहरु आफ्नै डिजाइनमा, नेपालीकै लगानीमा बन्नेछन्,’ उनले भने ।
प्रधानमन्त्रीले ऐतिहासिक सम्पदाले सर्ब जाति, धर्म, भाषा र सम्प्रदायको प्रतिनिधित्व गर्ने भन्दै यसले राष्ट्रिय एकता पनि बलियो बनाउने उल्लेख गरे ।

कार्यक्रममा एमाओवादी अध्यक्ष पुष्पकमल दाहालसहित मन्त्रीहरु, सरकारी उच्च अधिकारी, पुनर्निर्माण प्राधिकरणका अधिकारीहरुको उपस्थिति थियो ।