फाल्गुन ४, २०७२- पार्टीका नेताहरुले प्रतिष्ठाको लडाइँ बन्दा एमाले निकट अनेरास्ववियुको महाधिवेशन लम्बिएर सात दिन पुगेको छ ।

२७–२९ का लागि तोकिएको महाधिवेशनमा आफ्नो गुटलाई जिताउन नेताहरु नै भिडेपछि महाधिवेशन लम्बिएको छ । मनोनयन दर्ता मंगलबार सकिएकाले बुधबार बिहानदेखि मतदान सुरु हुने प्रचार विभाग प्रमुख अशेष घिमिरेले जानकारी दिए ।

नेतृत्वका लागि उपाध्यक्ष दीपक गौतम र महासचिव नविना लामाले प्यानलै बनाएर प्रतिस्पर्धामा उत्रिएका छन् । गौतमलाई माधवकुमार नेपाल र लामालाई संस्थापन पक्षको बलियो समर्थन छ ।

दुई गुटका नेताहरु आफ्ना उम्मेदवारलाई जिताउन भिडेरै लागेपछि महाधिवेशन झन् लम्बेतान हुँदै गएको छ ।  केही जिल्लाको प्रतिनिधि विवाद मिलाउनै ४ दिन लाग्यो ।
एक विद्यार्थी नेताका अनुसार अखिल अधिवेशन प्रतिनिधिलाई भन्दा बढी पार्टीका शीर्ष नेतालाई लागेको छ । लामाको पक्षमा स्थायी कमिटी सदस्य शंकर पोखरेल, नेताहरु खिमलाल भट्टराई, भानुभक्त ढकाल, माधव ढुंगेललगायत पलेंटी कसेरै लागेका छन् ।

गौतमको पक्षमा नेपाल पक्षका नेताहरु पार्टी उपमहासचिव घनश्याम भूसाल, सचिव योगेश भट्टराई, प्रकाश ज्वाला, राजेन्द्र राईलगायतका नेताहरु प्रत्यक्ष जोडिएका छन् ।

एमालेको प्रभावी संगठन अखिलको महाधिवेशनमा पार्टीको आगामी महाधिवेशनलाई झल्को दिने गरि नेतृत्व कब्जा गर्न पार्टी नेताहरु लागेपनि लम्बिंदै गएको हो ।

तीन दिनमा ६० लाख खर्च गर्ने गरि तयारी भए पनि करोडभन्दा बढी नाघिसकेको छ । महाधिवेशनमा १५ सय ४३ प्रतिनिधि छन् । महाधिवेशनले १ सय ४१ सदस्यीय केन्द्रीय कमिटी चयन गर्नेछ ।

लामा र गौतमको कडा टक्कर
महाधिवेशनमा नेतृत्व दौडमा रहेका नविना लामा र दीपक गौतमबीच कडा टक्कर छ ।

लामाको समूहमा उपाध्यक्षमा महेश बर्तौला, सुनिता बराल, रश्मि आचार्य र शैलेश लामा छन् । महासचिवमा ऐन महर, सचिवमा समिक बडाल, कमला बोहरा, आरसी लामिछाने, अमृत बुढा, दुर्गानन्द ठाकुर, मकर खड्का र वसन्त ढकाल छन् । कोषाध्यक्षमा झपिन्द्र खत्रीको उम्मेदवारी परेको छ ।

गौतमको समूहबाट उपाध्यक्षमा राधिका खतिवडा, जीवन राई, सरोज यादव र नीलकण्ठ आचार्यको उम्मेदवारी परेको छ । महासचिवमा अब्दुल हुसेन खाँ तथा सचिवमा अशेष घिमिरे, सुदेश पराजुली, भक्तकुमारी लामा, भीम रावल, आरती लामा, गौतम राई, वसिम आलम छन् । कोषाध्यक्षमा कमल शाहीको उम्मेदवारी परेको छ ।