माघ २९, २०७२- वर्षातअघि पुनर्निर्माणको काम सुरु नहुने निश्चित भएपछि भूकम्प पीडितहरू वर्षा छल्ने तयारीमा लागेका छन् । हुरी–बतासदेखि झरीबाट जोगिन उनीहरू नौ महिनाअघि निर्मित अस्थायी टहरोको मर्मतसम्भारमा जुटेका हुन् ।

‘बर्खा सुरु हुन लाग्यो, घर बनाइदिने सुरसार छैन,’ गोरखा १४ का ईश्वरबहादुर बानियाँले भने । भत्केको भग्नावशेष घरका काठ र जस्तापाता प्रयोग गनेर मजबुत टहरो बनाउन लागेको उनले बताए । वर्षा र भलबाढीबाट जोगिन टहरोको मर्मतसम्भार आफैंले गर्नुको विकल्प नदेखिएको उनले बताए । ‘सरकारको भर परेर बसेर हुँदैन रहेछ ।

जाडोमा लुगा किन्न दिने भनेको १० हजार अहिलेसम्म पाएको छैन,’ उनले भने । गोरखा र पालुङटार गाविसका पीडितलाई हालसम्म न्यानो कपडा किन्ने रकम वितरण गरिएको छैन । ‘ओत लाग्ने ठाउँ बनाउन पाए गुजारा चल्छ,’ उनले भने ।

गोरखा १२ की छलुमाया परियार पनि अस्थायी टहरो भएकै ठाउँमा घर बनाउने तयारीमा छन् । ‘सरकारले दया धर्मले दिए हात थाप्नु पर्ला,’ उनले भनिन्, ‘नदिए ऋण काढेर घर बनाउन लागेका हौं ।’ वैदेशिक रोजगारमा गएका छोराले घर बनाउन सहयोग गर्ने उनले बताइन् ।

‘हिउँद वर्षा टहरोमा बसेर दिग्दार भइयो,’ उनले भनिन् । भत्केकै पुरानो घर मर्मत गर्न थालेको स्वाँराकी डिलकुमारी गुरुङले बताइन् । ‘भर्खर गाउँमा इन्जिनियरको टोली आएको छ,’ उनले भनिन्, ‘घर बनाइदिने त कहिले हो कहिले ।’ अस्थायी टहरोमा प्रयोग भएको त्रिपाल च्यातिन थालेपछि जस्तापाता हालेर बर्खे झरी थेग्ने टहरो बनाउन लागेको उनले बताइन् ।

कतिपय स्थानका पीडितले धमाधम स्थायी प्रकृतिको घर बनाइरहेका छन् । ‘सरकारले दिएको १७ प्रकारको भूकम्पप्रतिरोधी घरको नक्सा हामीलाई मन परेन,’ बारपाककी टिलु घलेले भनिन्, ‘दुर्गममा त्यस्ता घर बनाउने स्रोतसाधन पनि छैन ।’ हिमाली क्षेत्रका लागि छुट्टै नक्सा हुनुपर्ने उनको माग छ ।