शम्भु कट्टेल
फोटो :फाइल फोटोकाठमाडौं: एक भियतनामी युवतीको राहदानीमा अर्कै व्यक्ति उडेपछि विमानस्थलका कर्मचारीले आलोचना खेपिरहेका बेला त्रिभुवन अन्तर्राष्ट्रिय विमानस्थलबाट एक महिला नाटकीय ढंगले हराएकी छन् । शंकास्पद यात्रा भन्दै श्रीलंका अध्यागमनले फर्काइदिएकी नवलपरासीकी मालती विक त्रिभुवन अन्तर्राष्ट्रिय विमानस्थल परिसरबाट माघ २४ गते एकाएक गायब भइन् ।
इन्डियन एयरलाइन्सका कर्मचारीले अध्यागमन कार्यालयलाई बुझाउन ल्याउँदै गर्दा मालती हराएकी हुन् । श्रीलंका अध्यागमनले मालतीको राहदानीलगायत कागजपत्र इन्डियन एयरलाइन्सलाई जिम्मा लगाई सोही जहाजबाट उनलाई काठमाडौं फर्काइदिएको थियो ।
इन्डियन एयरलाइन्सले त्रिभुवन अन्तर्राष्ट्रिय विमानस्थलस्थित अध्यागमन कार्यालयलाई जिम्मा लगाउनुको साटो मालती आफ्नो पन्जाबाट भागेको रिपोर्ट अध्यागमन कार्यालयलाई दिएको छ । तर एयरलाइन्सले मालतीको राहदानीलगायत कागजपत्र भने अध्यागमन कार्यालयलाई बुझाएको छ । उक्त एयरलाइन्सले जहाजबाट उत्रिएपछि अध्यागमन कार्यालयमा बुझाउन ल्याउँदै गर्दा मालती भागेको जानकारी दिएको छ ।
अध्यागमन विभागका निर्देशक वासु घिमिरेले विमानस्थलबाट मालती फरार भएको पत्र प्राप्त भएको बताए । उनले अन्नपूर्णसँग भने, ‘विमानस्थलबाट फरार भएकोबारे हामी बुझ्दैछौं ।’ एयरलाइन्सले मालती भागेकोबारे प्रहरी र अध्यागमनलाई ढिला गरी जानकारी गराएको स्रोतले बतायो ।
पक्राउ पर्ने डरले मालतीले एयरलाइन्स र अध्यागमनलाई झुक्याएर भागेको हुनसक्ने आशंका गरिए पनि आर्थिक लेनदेन र सेटिङमा उनलाई भगाइएको दाबी विमानस्थल स्रोतले गरेको छ । उनी बिनाराहदानी अध्यागमनको आगमन (अराइभल) कक्षबाट समेत बाहिर आउनु शंकास्पद देखिएको छ । बिनाराहदानी अध्यागमनको आगमन कक्षबाट छिर्नसक्नु ठूलो लापरबाही हो ।
आगमन कक्षमा प्रहरी र अध्यागमन अधिकारीहरू यात्रुको निगरानी गर्न खटिएका हुन्छन् । यात्रुको चाप भएका बेला प्रहरी र अध्यागमनका कर्मचारीले यात्रुलाई क्रमबद्ध मिलाएर मात्र आगमन छापका लागि अध्यागमन कक्षमा पठाउँछन् । अध्यागमन अधिकृतले यात्रुले भरेको विवरण हेरेपछि राहदानीमा आगमन छाप लगाइदिन्छन् ।
तर मालतीले न आगमन फाराम भरिन्, न त अध्यागमनको आगमन कक्षमा नै गइन् । बिनाराहदानी उनले अध्यागमन पार गरिन्, त्यो पनि आश्चर्यजनक ढंगले ।
त्यस्तो सुरक्षा संवेदनशील क्षेत्रबाट मालती भाग्नु रहस्यमय बनेको छ । ‘अध्यागमन, प्रहरी र एयरलाइन्सका कर्मचारीको सेटिङबिना कुनै यात्रु भाग्नु असम्भवप्रायः हुन्छ’, अध्यागमन कार्यालयका एक अधिकृतले भने, ‘उनी कसरी भाग्न सफल भइन्, हामीसमेत आश्चर्यमा परेका छौं ।’
इन्डियन एयरलाइन्सले मालतीको ०५७८८२५१ नम्बरको राहदानी र अन्य कागजपत्र विमानस्थलस्थित अध्यागमन कार्यालयलाई बुझाएको छ । भारतको राजधानी नयाँदिल्लीबाट श्रीलंका हुँदै कुवेत जान लागेकी मालतीलाई श्रीलंकाको अध्यागमनले यात्रामाथि शंका गर्दै फर्काइदिएको थियो । उनी माघ २२ गते शुक्रबार भारतको नयाँदिल्ली हुँदै श्रीलंका गएकी थिइन् ।
यसअघि पुस २७ गते भियतनामी युवती ले थि किमतुको राहदानीमा अर्कै व्यक्ति उडेकी थिइन् । त्यसबारे गृह मन्त्रालयले छानबिन गरिरहेको छ । गृहमन्त्री शक्ति बस्नेतले अर्काको राहदानीमा उडेको व्यक्तिलाई प्रस्थान अनुमति दिने व्यक्तिलाई कारबाही गर्ने बताए ।
बस्नेतले अन्नपूर्णसँग भने, ‘त्यसबारे छानबिन हुँदैछ । दोषीलाई कारबाही गरेरै छोड्छु ।’ किमतुको बी २४५५५७९ नम्बरको राहदानीबाट अर्कै व्यक्ति उडेको खुलासा भएपछि विमानस्थलमा खटिएका अध्यागमन कार्यालयका कर्मचारी र प्रहरीको भूमिकामाथि प्रश्न उठेको छ ।
annapurnapost