संवैधानिक बाध्यताका कारण कांग्रेसको १३ औं महाधिवेशन भने नसर्ने भएको छ । कोइरालाको निधनपछि कांग्रेस केन्द्रीय कार्यसमितिको आकस्मिक बैठकले महाधिवेशन पूर्वानिधारित मितिमा नै गर्ने निर्णय गरेको हो । निधनको १३ औं दिनसम्म पार्टीको औपचारिक कार्यक्रम भने नगर्ने निर्णय गरिएको छ । कांग्रेसका गाउँ, नगर, वडा, क्षेत्र र जिल्ला अधिवेशनको जारी प्रक्रिया माघ मसान्तसम्मलाई रोकिएको छ ।

रोकिएको निर्वाचन प्रक्रिया फागुन १ बाट सुरु हुनेछ । ‘सम्भवत: महाधिवेशन सर्दैन,’ उनले भने, ‘फागुनभित्र महाधिवेशन गराउनुपर्ने संवैधानिक बाध्यता नि छ ।’ कार्यवाहक सभापति रामचन्द्र पौडेलको अध्यक्षतामा बसेको बैठकले राष्ट्रियता, लोकतन्त्र र समाजवादप्रति अविचलित निष्ठा, सादा र सरल जीवनशैली तथा सुदृढ चारित्रिक र नैतिक बलद्वारा राष्ट्रिय स्थान बनाएका कोइरालाको निधनले सिंगो देशका लागि अपूरणीय क्षति पुगेको उल्लेख गरेको छ ।

‘अत्यन्त जटिल बन्दै गएको संक्रमणकालीन राजनीतिका बेला संविधानसभाबाट नेपालको संविधान जारी गर्ने अभियानको मुख्य नेताका रूपमा चीरपर्यन्त सम्झने छन्,’ कांग्रेस बैठकले भनेको छ, ‘संविधान निर्माणपछि पनि संविधानको कार्यान्वयन र यसको निरन्तर परिमार्जनद्वारा संविधानको व्यापक स्वीकारोक्ति बढाउन श्रद्धेय कोइरालाले संविधान संशोधन प्रक्रियाको समेत नेतृत्व गर्दै आन्दोलनरत सबै पक्षलाई एकता, सहमति र सहकार्यको बाटोमा संलग्न गराउन महत्त्वपूर्ण भूमिका निर्वाह गर्नुभयो ।’

बैठकले मधेसमा आन्दोलनरत पक्षलाई निरन्तर संवाद र वार्तामा संलग्न राखेर हिमाल, पहाड, मधेस र तराईका जनताका भावना र पारस्परिक एकतालाई सुदृढ बनाउन र सम्मानजनक निकास खोज्न जीवनको अन्तिम घडीसम्म कोइरालाले निर्वाह गरेको भूमिका अविस्मरणीय रहेको बताएको छ । ‘कोइरालाको समन्वयकारी भूमिका एवं धैर्यताका साथ सबै पक्षसँग संवाद गर्ने अग्रसरताका कारण आन्दोलनको जोखिमबाट देश आज शान्ति, स्थिरता र सहजतातर्फ विस्तारै फर्किएको छ,’ बैठकपछि जारी विज्ञप्तिमा भनिएको छ, ‘नेपाली कांग्रेस शोकको यो घडीमा शान्ति र स्थिरतातर्फ फर्किंदै गएको यो यात्रालाई सुरक्षित ढंगबाट गन्तव्यसम्म पुर्‍याउने संकल्प गर्दछ ।’ कोइरालाले देखाएको निष्ठा, नैतिकता र सरलजीवन पद्धतिलाई पार्टीको प्रेरणा र पुँजीका रूपमा ग्रहण गर्दै धैर्य धारणा गर्न बैठकले अपिल गरेको छ ।

केन्द्रीय कार्यसमितिले १३ दिनसम्म पार्टी केन्द्रीय कार्यालय र देशभरिका कार्यालयहरूमा पार्टीको झन्डा झुकाउने र औपचारिक कार्यक्रम नगर्ने निर्णय लिएको छ । फागुन ३ गतेसम्म पार्टीका केन्द्रीय कार्यालयसहित सम्पूर्ण कार्यालय र भ्रातृसंस्थाका कार्यालयहरू बन्द गर्ने, फागुन ९ गते सबै जिल्लामा श्रद्धाञ्जलि सभा आयोजना गर्ने, काठमाडौं उपत्यकाका हकमा तीन जिल्लाले संयुक्त श्रद्धाञ्जलि सभा गर्ने निर्णय लिएको छ ।