शिवप्रसाद उप्रेती
गोरखा: भूकम्प र लगत्तैको पहिरोले क्षतिग्रस्त मनास्लु पर्यटन पदमार्गको मर्मत सम्भार हुने भएको छ।
पर्यटन बोर्डको मनास्लु क्षेत्र पदयात्रा मार्ग पुनर्निर्माण कार्यक्रम तथा विभिन्न स्रोत जुटाएर मर्मत सम्भार गरिने गोरखा जिल्ला पर्यटन विकास समितिका अध्यक्ष तथा स्थानीय विकास अधिकारी प्रेमराज गिरीले जानकारी दिए।पर्यटन बोर्डको मनास्लु क्षेत्र पदयात्रा मार्ग पुनर्निर्माण कार्यक्रमको दुई करोड २० लाख र ग्रेट हिमालयन ट्रेलको एक करोड रुपैयाँबाट काम सुरु गर्ने निर्णय भएको उनले बताए।
जिविसमा आइतबार सम्पन्न सरोकारवालाको छलफल कार्यक्रममा जिल्लाका सभासद् हितराज पाण्डे, छमबहादुर गुरुङ र कृष्ण धिताल, पर्यटन विभागका सिनियर डिभिजन इन्जिनियर पोषनाथ अधिकारीसमेत सहभागी थिए। कार्यक्रममा भूकम्प र त्यसपछिको पहिरोका कारण बिग्रिएको केरौंजा दोभानदेखि जगत जाने पदमार्गको बगरमा तत्कालका लागि बहाव दायाँबाट बायाँ सार्ने निर्णय भएको छ।
त्यसका लागि हाल दुई करोड २० लाख खर्च गर्ने र दीर्घकालसम्मका लागि दायाँपट्टि पदयात्रा मार्ग निर्माण गर्न पर्यटन विभागको नेतृत्वमा डीएफआईडीको सहयोग लिई छिटो प्रक्रियाद्वारा काम गर्ने निर्णय भएको गिरीले जानकारी दिए। दीर्घकालसम्मका लागि पदमार्ग पक्की बनाउन चार करोडसम्मको बहुबर्षे टेन्डर निकाल्ने विषयमा छलफल भएको उनले बताए।
बैठकले चुम्चेतको सिर्दीखोलाको भीर र सिर्दीखोलादेखि छेकम्मारसम्मको पदमार्ग निर्माण र सुधार गर्न एमक्यापलाई जिम्मा दिने निर्णय गरेको छ। त्यस्तै लापु गाविसको नौलीखोलादेखि गुम्दाको माछाखोलासम्मको पदमार्ग सुधार गर्न आईओएम नामक विदेशी संस्थालाई जिम्मा दिने पनि निर्णय गरेको उनले बताए।
माछीखोलादेखि गुम्दाको सिङ्लासम्मको पदमार्ग सुधार गर्न केयर नेपाल नामक संस्थालाई जिम्मा दिने, उहियाको खोर्लाबेसीदेखि उहिया गाउँसम्मको बाटो सुधार गर्न पिपुल इन निड नामक संस्थालाई आग्रह गर्ने, सम्भव नभए जिविसअन्तर्गत पर्यटन विकास समितिले गर्ने निर्णय भएको योजना अनुगमन तथा प्रशासकीय अधिकृत सतिशकुमार भट्टराईले जानकारी दिए।
उनका अनुसार ग्रेट हिमालयन ट्रेल विकास कार्यक्रमतर्फको एक करोड रुपैयाँ ल्हो, सामागाउँ, साम्दो, लार्केपास हुँदै मनाङको भीमथाङसम्मको पदमार्ग निर्माण सुधारमा खर्च गर्ने निर्णय भएको छ। उहियाको तातोपानीदेखि सामागाउँसम्मको पदमार्ग सुधार गर्न पर्यटन विभागलाई अनुरोध गर्ने निर्णय पनि भएको उनले बताए।
भूकम्प र त्यसपछिको पहिरोका कारण बिग्रिएको केरौंजा दोभानदेखि जगत जाने पदमार्गको बगरमा तत्कालका लागि बहाव दायाँबाट बायाँ सार्ने निर्णय भएको छ।
annapurnapost
