गोरखा- उत्तरी गोरखामा बुधबार पनि हिउँ परेको छ। तिम्बतसँग सिमाना जोडिएको दुर्गम गाउँ छेकम्पार र सामागाउँमा हिउँ परेको हो। छेकम्पारमा डेढ फिट र सामागाउँमा दुई फिटसम्म हिउँ जमेको स्थानीयलाई उद्धृत गर्दै प्रहरीले जनाएको छ। माथिल्लो क्षेत्रमा हिउँ परेपछि चिसो ह्वातै बढेको छ भने तल्लो क्षेत्रमा मंगलबारदेखि घाम नलाग्दा चिसो स्याँठ र हुस्सुले टहरामा बसेका भूकम्प पीडितको जाडोले बिल्लिबाठ भएको छ।
‘मंगलबारदेखि हिउँ परेको हो, बुधबार पनि बिहानसम्म उस्तै छ, चिसो अत्यधिक बढेको छ,’ छेकम्पारका तेन्चोक लामाले भने, ‘अब बाली सप्रने भो, तर चिसोले खपिसक्नु छैन।’ त्यहाँ दुई फिटसम्म हिउँ जमेको छ। मंगलबारदेखि घाम नलागेको उनले बताए। सामागाउँमा पनि दुई फिट हिउँ जमेको जिल्ला प्रहरी कार्यालयले जनाएको छ। सिडिएमए फोन मात्रै चल्ने त्यहाँ सोलारबाट टावर सञ्चालन गरिएको छ। घा
म नलागेर सोलारले पनि काम नगर्दा टेलिफोन सञ्चालन हुन नसकेको छेकम्पारका गाविस सचिव लालप्रसाद भट्टराईले बताए। उनले भने, ‘टावरमा हिउँ जमेको छ, घाम देखिएको छैन, अहिले फोन पनि चलेको छैन, त्यहाँको अवस्था यसै भन्न सकिन्नँ,’ उनले भने।
दिनभर घाम नझुल्कँदा जिल्लाको तल्लो भेगका भूकम्प पीडितको पनि दैनिकी कष्टकर बन्यो। दुई दिनदेखि रात दिन चिसो स्याँठ चल्न थालेपछि चिसो ह्वातै बढेको सौरपानीका मिलन ढकालले बताए। बारपाक, लाप्राक, गुम्दा, उहिया, केरौंजा लगायत ठाउँमा पनि चिसो बढेको छ। स्थानीय टहरोभित्रै आगो तापेर धेरै समय बिताउने गरेका छन्। न्यानो कपडा भूकम्पले पुरिएपछि सरकारले दिएको पैसा पनि घर खर्चमा सकेको पीडितले लुगलुग काँप्दै दिन गुजारिरहेका छन्।
nagariknews
