गोरखाको मनकामना दर्शन प्रा.लि.ले चितवनको दारेचोक गाविसका बिभिन्न बिद्यालयमा पढ्दै आएका बिपन्न समुदायका बिद्यार्थीलाई न्यानो कपडा बितरण गरेको छ। प्रा.लि.का संस्थापक लक्ष्मणबाबु श्रेष्ठको स्मृतिमा गठन भएको लक्ष्मणबाबु स्मृती कोषले दुई सय जना बिद्यार्थीलाई न्यानो कपडा बितरण गरेको हो।
प्रालिका प्रबन्धक एवं कोषका सचिव राजेशबाबु श्रेष्ठले चिसोले कठ्याग्रिंएका बिद्यार्थीलाई ज्याकेट बितरण गरेका हुन्। एक लाख ६० हजार रूपैंयाको न्यानो कपडा चेपाङ, बिश्वकर्मा लगायत बिपन्न बर्गका बिद्यार्थीलाई बितरण गरिएको हो।
मनकामना दर्शन प्रा.लि. ले प्रभावित गाबिसका बिद्यार्थीको शिक्षामा सहयोगी भूमिका निर्वाह गर्दै आएको छ। यसअघि प्रालिका संस्थापक श्रेष्ठको पहलमा मुग्लिनमा भारतीय दुतावासले पाँच करोड लगानीमा बिद्यालय भबन निर्माण गरिदिएको थियो।
दारेचोक गाबिस भबन र वडा नं. ४ को तमिन पुगेर राजेशबाबु श्रेष्ठले बिद्यार्थीलाई न्यानो कपडा बाँडेका हुन्। न्यानो कपडा पाएपछि बिद्यार्थीहरु खुसी भएका छन्। दारेचोकको गणेश प्राबिका ३७ जना, इच्छाकामना प्राबिका २८ जना, अमरदीप प्राबिका ४१ जना र तमीन प्राबिका ९२ जना बिद्यार्थीलाई न्यानो कपडा बितरण गरिएको हो।
भूकम्पपछि प्रालिले मनकामनालगायत गोरखाका बिभिन्न गाबिसमा राहत सामग्री बितरण गरेको थियो।
