शिवप्रसाद उप्रेती
फोटो : सोमबार सदरमुकाम आइपुगेका योगेन्द्र कुँवर र सम्झना राना।तस्बिर: अन्नपूर्णविद्यार्थी सोध्छन् ‘बिहेपछि पढ्न नपाउने भन्ने नियम छ र?
गोरखा: ‘पढ्दापढ्दै विवाह गरेको’ भन्दै यहाँको एक विद्यालयले एसएलसीको तयारी गरिरहेका दुईजना विद्यार्थीलाई विद्यालयबाट निष्कासन गरेको छ।
मिरकोटको त्रिवेणी माविले एसएलसीको तयारी गरिरहेका योगेन्द्र कुँवर र सम्झना रानालाई विद्यालय प्रवेशमा रोक लगाएको हो।एउटै विद्यालयमा कक्षा १० मा पढ्ने कुँवर र रानाले गत मंसिर १३ गते बिहे गरेका थिए।
‘समितिको निर्णय’ भन्दै विद्यालयले उनीहरूलाई त्यस दिनदेखि विद्यालयमा जान नदिएको विद्यार्थीले जनाएका छन्। विद्यालयले एसएलसी परीक्षाबाट वञ्चित गर्ने तयारी गरेपछि उनीहरू न्याय माग्न दुवै पक्षका अभिभावकलाई लिएर जिल्ला शिक्षा कार्यालय पुगेका छन्।
‘हामीले मंसिर १३ गते बिहे गरेका हौं’, सदरमुकाममा आइपुगेकी सम्झनाले भनिन्, ‘बिहे गरेको केही दिनमा स्कुल गएको त किन आएको भन्दै हेड सरले मलाई गेटबाट निकाल्नुभयो। त्यो दिनदेखि स्कुल जान पाएकी छैन। सरले हामी कुनै हालतमा पनि तिमीहरूलाई यहाँ पढ्न दिन्नौं भन्नुभएको छ।’
उनले विवाह गरेपपछि पढ्न नपाउने नियम भएनभएको विषयमा अनभिज्ञता प्रकट गरिन्।’बिहेपछि पढ्नै नपाउने भन्ने नियम छ र?’उनले सोधिन्, ‘नियम नै छ भने त केही भन्नु छैन । हैन भने किन निकाल्ने हामीलाई एसएलसीको मुखमा ?’
एसएलसी दिने अन्तिम अवस्थामा निष्कासन हुनुपर्दा योगन्द्रले पनि चिन्ता व्यक्त गरे। ‘एसएलसी आउन लाग्या छ’, योगेन्द्रले भने, ‘स्कुल जानै पाइँदैन । विद्यालय व्यवस्थापन समिति र हेड सरले हामीलाई स्कुल गएर पढ्न दिनुभएन। त्यसैले हामी अभिभावक लिएर जिल्ला शिक्षा कार्यालय आएका छौं । कार्यालयले जे भन्छ, त्यही गर्छौं।’
प्रधानाध्यापक चूडामणि अधिकारीले २०६८ साल फागुन ४ गते यस विषयमा भएको निर्णय कार्यान्वयन गरेको जबाफ दिएका छन्।’एउटै विद्यालयमा पढ्ने विद्यार्थीले बिहे गरे भने निष्कासन गर्ने भन्ने यसअघिकै निर्णय छ’, उनी भन्छन्, ‘मैले त निर्णय कार्यान्वयन गराउने हो। अब शिक्षा कार्यालयले जे भन्छ, त्यही गर्छु।’
जिल्ला शिक्षा कार्यालयले आफूहरूलाई मौखिक उजुरी आएको जनाएको छ। ‘हामीले पढ्ने व्यवस्था मिलाइदिन अनुरोध गरेको बेहोराको निवेदन माग गरेका छौं’, सहायक जिशिअ ठाकुरजी तिवारीले भने, ‘उनीहरूबाट निवेदन पाएपछि पहिलेझैं पठनपाठनको व्यवस्था हुनेछ।’
विद्यार्थीका अभिभावक पनि विवाहप्रति खुसी छन्। सम्झनाका बाबु टेकबहादुर र योगेन्द्रका बाबु नन्दबहादुर भन्छन्, ‘उनीहरूको विवाहप्रति हामी खुसी छौं। उनीहरूले पढ्न पाउनुपर्छ। विवाह गरेको भन्दै पढ्न नदिने कानुन कहाँ छ?’
annapurnapost
