औषधि र न्याना कपडा पुर्याउन प्रधानमन्त्रीको निर्देशन
२६ पुस, काठमाडौं । हिमपातका कारण प्रभावित भूकम्प पीडितहरुलाई उद्धार गर्न नेपाली सेनाको टोली आइतबार गोर्खा जाने भएको छ । औषधि, खाद्यान्न र न्याना कपडासहित सेनाको टोली गोर्खा जान लागेको हो ।
हिमपातका कारण गोर्खाको उत्तरी भेगका बासिन्दाको बिचल्ली भएको जानकारी पाएलगत्तै प्रधानमन्त्री केपी शर्मा ओलीले सिंहदरबारमा आइतबार विहान आकस्मिक बैठक बोलाएका थिए । बैठकमा गृहमन्त्री, रक्षामन्त्री, सुरक्षा निकायमा प्रमुखलगायत थिए । बैठकमा प्रधानमन्त्री ओलीले प्रभावित क्षेत्रमा तत्कालै उद्धार टोली पठाउन निर्देशन दिएका थिए ।
बैठकपछि सञ्चारकर्मीसँग कुरा गर्दै रक्षामन्त्री भीम रावलले नेपाली सेनाको हेलिकोप्टर स्वास्थ्यकर्मीसहित गोर्खा जाने जानकारी दिए । उनका अनुसार सेनाको टोलीले उद्धार गर्नुपर्नेलाई उद्धार गर्ने, न्यानो कपडा आवश्यक भएकालाई कपडा बाँड्ने र उपचार गर्नुपर्नेलाई उपचार गर्नेछ ।
सरकारी टोली पनि गोर्खा जाने
नेपाली सेनासँगै स्थानीयको समस्या र आवश्यकतालाई कसरी सम्बोधन गर्न सकिन्छ भनेर अध्ययन गर्न रक्षा र गृहमन्त्रालय मातहतको टोली त्यसतर्फ जाने गृहमन्त्री शक्ति बस्नेतले जानकारी दिए । भूकम्प पीडितहरुलाई परेको समस्याप्रति सरकार गम्भीर रहेको भन्दै राहत पुर्याउन सदैब तयार रहेको उनले बताए ।
onlinekhabar
