हेलिकोप्टरसहित नेपाली सेनाको टोली अाइतबारै जाने
हिमपातपछि बिचल्लीमा परेका भूकम्पपीडितहरुको उद्धारका लागि सरकारले गोरखाको बारपाक र लाप्राक क्षेत्रमा नेपाली सेनाको हेलिकोप्टरसहितको टोली पठाउने भएको छ।
सुरक्षा निकायका प्रमुखहरुसहित आइतवार विहान सिहंदरबारमा बसेको राष्ट्रिय सुरक्षा परिषद्को बैठकमा प्रधानमन्त्री केपी शर्मा ओलीले हिमपातका कारण प्रभावित गोरखाका भूकम्पपीडितहरुलाई उद्धारका लागि हेलिकोप्टरसहित नेपाली सेनाको टोली पठाउन निर्देशन दिएका हुन्।
प्रधानमन्त्री ओलीले हिमपातपछि प्रभावित भूकम्पपीडितहरुलाई राहत सामाग्री समेत लगेर वितरण गर्न निर्देशनसमेत दिएका छन् । हिमपातका कारण टहरोमा बसेका भूकम्पपीडितहरु वाहिरसम्म निस्किन नसक्ने अवस्था आएको समाचार सार्वजनिक भएपछि प्रधानमन्त्री ओलीले गृह र रक्षामन्त्रीसहितको आकस्मिक बैठक बोलाएर तत्काल राहतका कार्यक्रम लैजान निर्देशन दिएका हुन्।
प्रधानमन्त्रीले हिमपात भएको भूकम्प प्रभावित क्षेत्रका जनतासामु राज्यको बलियो उपस्थिति देखाउन निर्देशन दिएको बैठकमा उपप्रधानमन्त्री तथा रक्षामन्त्री भिम रावलले जानकारी दिए।
प्रधानमन्त्रीको निर्देशनपछि नेपाली सेनाको एक टोली राहत सामाग्री लिएर प्रभावित क्षेत्रका भूकम्पपीडितको उद्धारका लागि हेलिकोप्टरमार्फत आइतवार नै गोरखा जानेछ। वैठकमा गृहमन्त्री शक्ति बस्नेत, रक्षामन्त्री भीमबहादुर रावल, मूख्य सचिव सोमलाल सुवेदी लगायत तीनवटै सुरक्षा निकायका प्रमुखहरु सहभागी थिए।
शनिवार वर्षासँगै भएको हिमपातका कारण गोरखाको बारपाक र लाप्राकसहित हिमाली भेगमा टहरो बनाएर बसेका भूकम्पपीडितहरुको विचल्ली भएको छ। टहरालाई हिमपातपछि परेको हिउँले पुरै ढाकेपछि भूकम्पपीडितहरु रातभर चिसोमै बस्न बाध्य भएका थिए।
setopati
