शिबप्रसाद उप्रेती
फोटो :फाइल फोटोगोरखा : शान्ति तथा पुनःनिर्माण मन्त्री एकनाथ ढकालले भारतले नाकाबन्दीबाट सिर्जित क्षतिको क्षतिपूर्ति तिर्नुपर्ने बताएका छन् ।
आइतबार गृहजिल्ला गोरखा पुगेका मन्त्री ढकालले पत्रकारहरुसँगको भेटमा भूकम्पबाट भन्दा पनि नाकाबन्दीबाट बढी क्षति भएको भन्दै यसको क्षतिपूर्ति भारतले तिर्नुपर्ने दाबी गरे ।
‘तीन महिना भयो, आपूर्ति ठप्प भएको । यसले भुकम्पबाट भन्दा पनि धेरै क्षति भएको छ’ उनले भने, ‘यसको क्षतिपूर्ति भारतले तिर्नुपर्छ । भूकम्पबाट करिब सात खर्ब क्षति भएको थियो । नाकाबन्दीबाट त्यो भन्दा बढि क्षति नेपालीले बेहोर्नु परेको छ । यो हामीले सहने कुरै हुँदैन ।’
आपूर्ति व्यबस्थाको नाममा यो सरकार भारतसँग नझुक्ने उनले जिकिर गरे । ‘तराई–मधेसको मामिला भनेको बिल्कुलै नेपालको आन्तरिक मामिला हो’, उनले भने ‘यसको कारण भारतले लगाएको नाकाबन्दीले नेपाल सरकारलाई झुकाउने छैन । आपूर्तिको नाममा हामी भारतसँग झुक्दैनौं ।’
मुलुक सानो छ भन्दैमा, जनसंख्या थोरै छ भन्दैमा नेपालले झुक्नु नपर्ने उनको धारणा छ । ‘एक्काइसौं सताब्दीको लडाइँ बन्दूकको होइन । सत्यताको लडाइँ हो । मूल्यको लडाइँ हो’ उनले भने ‘जनसंख्या थोरै छ भन्दैमा, मुलुक सानो छ भन्दैमा उसको सार्बभौमिकता सानो हुदैन । भारत त बरु ब्रिटिशसामु झुकेको थियो । हामी झुकेका थिएनौं । अहिले हामी कोहीसँग झुक्नु पर्ने आबश्यकता छैन ।’
उनले रक्सौल बाहेक अन्य नाकाबाट आयात सहज हुँदै गएको बताउँदै एक साताभित्र सबै नाका खुल्ने दाबी गरे । सरकार शान्ति र संबादबाटै समस्याको समाधान चाहन्छ भन्दै ढकालले बल प्रयोग गरेर नाकामा बसेका आन्दोलनकारी बल प्रयोग गरेरै हटाइने चेतावनी दिएका छन् ।
फरक प्रसंगमा बोल्दै मन्त्री ढकालले गोरखा फूजेलका नन्दप्रसाद अधिकारीका परिवारले न्याय पाउने बिश्वास ब्यक्त गरे ।
देश शान्ति प्रक्रिया स्थापित गर्ने चरणमै रहेकाले द्वन्द्वका बेला उत्पन्न समस्याको समाधान खोजिने उनको भनाइ छ । मन्त्री ढकाल जनताको संबिधान जनताको माझमा कार्यक्रममा गोरखा आएका हुन् ।
annapurnapost
