कैलासबावु श्रेष्ठ/गोरखा
पौष १७ गते । गोरखाका बिभिन्न ३ गाविसलाई आज पूर्ण खोपयुक्त गाविस घोषणा गरिएको छ । जिल्लाको बगुवा, बुंकोट र हर्मी गाउँ बिकास समितीलाई पहिलो चरणमा पूर्ण खोपयुक्त घोषणा गरिएको हो ।
तोकिएको उमेर समूहका सबै बालबालिकाले सबै प्रकारको खोप पाएको तथ्याङ्कका आधारमा आज ति गाबिसलाई पूर्ण खोपयुक्त गाबिस घोषणा गरिएको जिल्ला जनस्वास्थ्य कार्यालयले जानकारी दिएको छ ।
एक वर्ष मूनिका बालबालिकाको तथ्याङ्कलाई आधार मानेर पूर्ण खोप पूरा गरे नगरेको आधारमा यस्तो घोषणा गरिएको हो । बालबालिकाले बिसिजि, डिपिटी, पोलियो, दादुरा खोप पूर्ण रुपमा पाएको अबस्थामा जिल्लाको यि ३ गाबिसलाई पूर्ण खोपयुक्त घोषणा गरीएको थियो ।
बगुवालाई पश्चिमाञ्चल क्षेत्रीय स्वास्थ्य निर्देशक डाक्टर तारानाथ पौडेल, बुंकोटलाई स्थानीय विकास अधिकारी प्रेमराज गिरी र हर्मीलाई प्रमुुख जिल्ला अधिकारी उद्धव तिमल्सेनाले पूर्ण खोपयुक्त घोषणा गरेका थिए ।
नियमित खोप कार्यक्रममा कुनै पनि बालबालिका नछुटुन् भनेर घोषणाको अभियान शुरु गरिएको हो । सन् २०१७ सम्ममा देशभरका सबै जिल्लालाई पूर्ण खोपयुक्त घोषणा गर्ने सरकारको तयारी छ । हालसम्म देशका १० जिल्लालाई पूर्ण खोपयुक्त घोषणा गरी सकिएको छ । 
तस्बिर सौजन्य नारायणबावु अर्याल, जिल्ला स्वास्थ्य कार्यालय, गोरखा
