गाेरखा । गुल्मीकाे कालीगण्डकी करिडोरअन्तर्गत रुद्रवेणी–पुर्तिघाट सडकखण्डमा आइतबार राति मोटरसाइकल दुर्घटना हुँदा २ जनाको ज्यान गएको छ ।
ज्यान गुमाउनेमा मोटरसाइकल चालक स्याङ्जा, कालीगण्डकी गाउँपालिका–३ भुस्तुङ निवासी ३४ वर्षीय लक्ष्मण थापा र सोही ठाउँका ४५ वर्षीय गिरमान सिंह राना रहेको जिल्ला प्रहरी कार्यालय गुल्मीले पुष्टी गरेकाे हाे ।
जिल्ला प्रहरी कार्यालय गुल्मीका प्रहरी नायब उपरिक्षक गङ्गाबहादुर सारुका अनुसार आइतबार राति करिब १० बजे सत्यवती गाउँपालिका–१ ठूलाबगर छल्दीस्थित रुद्रवेणीबाट चेमीतर्फ जाँदै गरेको लु ३६ प ३६२७ नम्बरको मोटरसाइकल सडकबाट तल खसेको थियो ।
दुर्घटनामा घाइते भएका थापाको टाउकोमा चोट लागेको थियो भने रानाको टाउको र खुट्टामा चोट लागेको थियो । उनीहरु दुवैजनाको उपचारका क्रममा प्राथमिक स्वास्थ्य केन्द्र रिडीमा गए राति ज्यान गएको हाे ।
प्रहरीले घटनाकाे अनुसन्धान सुरु गरेकाे जनाएको छ ।
