गोरखा । नेपाली कम्युनिष्ट पार्टी गोरखाको जिल्ला संयोजकमा अंकुुर तिमल्सिना (आयाम) लाई जिम्मेवारी दिइएको छ । पार्टीको आज बसेको जिल्ला समितिको बिस्तारित बैठकले साविक माओवादी केन्द्रका जिल्ला सचिव तिमल्सिनालाई नेकपाको जिल्ला संयोजकको रुपमा सर्व-सम्मत चयन गरिएको पार्टीका केन्द्रीय सदस्य विशेश्वर कट्टेलले जानकारी दिए ।
बैठकले नेकपा जिल्ला सह-संयोजकमा साविक एकिृकत समाजवादीका टेकराज भट्टलाई चयन गरेको छ । बैठकले पार्टी जिल्ला समिति ३९९ सदस्य रहने गरी अनुमोदन गरेको उनले बताए ।
तात्कालिन नेपाल कम्युनिष्ट पार्टी माओवादी केन्द र एकिकृत समाजवादीसहित बिभिन्न १५ वटा कम्युनिष्ट पार्टी विच एकता सम्पन्न भएपछि गोरखा जिल्लामा पार्टी संयोजक र सह-संयोजक चयन भएको हो ।
बैठकलाई सम्बोधन गदै पार्टीका केन्द्रीय सदस्य हरिराज अधिकारीले नेपाल कम्युनिष्ट पार्टी देश निर्वाचनको दिशामा अघि बढेको भन्दै अव एकिकृत पार्टीलाई जनताको आवश्यकता र चाहना अनुसार परिचालन गरेर अगाडी बढाउनु पर्ने बताए ।
अहिले प्राप्त सवै प्रकारका उपलब्धीहरुलाई खोज्ने प्रयास बिभिन्न ढंगबाट भइरहेको भन्दै उनले त्यस्ताखालका षडयन्त्रलाई परास्त गर्नुपर्ने आवश्यकता रहेको औंल्याए ।
बैठकमा पार्टीका अर्का केन्द्रीय सदस्य लेखनाथ न्यौपानले पार्टीलाई ठूलो बलिदानको जगमा उभिएको नेपाली कम्युनिष्ट पार्टीलाई जनता बिचमा पुर्याउन हरेक नेता कार्यकर्ताको उत्तिकै भूमिका हुने बताए ।
देशमा वदलिइएको नयाँ परिस्थितलाई गम्भीरता पूर्वक लिएर पार्टीलाई सुदृढ गर्दै जानुपर्ने उनको भनाई छ ।
बैठकलाई पार्टी केन्द्रीय सदस्य अमर तमु, विशेश्वर कट्टेललगायतले पनि सम्बोधन गरेका थिए । सम्बोधनमा नेताहरुले पार्टीको वैचारिक दिशा, संगठनात्मक सुदृढीकरण, वर्तमान राजनीतिक अवस्था र आगामी कार्यदिशा बारे धारणा व्यक्त गरेका थिए ।
बैठकमा नवनियुक्त जिल्ला समितिका संयोजक, सहसंयोजक तथा सदस्यहरुलाई पदतथा गोपनियताको सपथ ग्रहणसमेत गराइएको थियाे ।
जिल्लास्थित पार्टीका केन्द्रीय सदस्यहरु, प्रदेश समितिका सदस्यहरु तथा जिल्ला समितिका सदस्यहरुको सहभागिता रहेको थियो ।