गाेरखा । गोरखाको आरुघाट गाउँपालिकाले आफ्ना सीमा भित्रका नदी, खोल्सा, ताल र अन्य जलाशयहरूमा विद्युतीय करेन्ट र विषादी प्रयोग गरी माछा मार्न पूर्ण रुपमा निषेध गरेको छ ।
गाउँ कार्यपालिकाको कार्यालयले मंगलबार सूचनामार्फत यस्ता अवैध क्रियाकलापमा संलग्न हुने व्यक्तिमाथि प्रचलित कानुनबमोजिम कडा कानुनी कारबाही गरिने चेतावनी दिएको हो ।
गाउँपालिकाभित्र हालका दिनमा केही व्यक्तिहरूले लुकीछिपी विद्युतीय करेन्ट, प्रतिबन्धित विष तथा विषादी प्रयोग गरी माछा मार्ने गरेको गुनासो बढेपछि यस्ता गैह्रकानुनी कार्य रोक्न गाउँपालिकाले सूचनामार्फत सचेत गराएको हो ।
प्रशासकीय अधिकृत विवेक खनालले जारी गरेको सूचनामा “यस्ता घातक विधि प्रयोगले जलचर विनाश हुनुका साथै वातावरणीय सन्तुलनमा गम्भीर असर पर्ने र मानव स्वास्थ्यसमेत जोखिममा पर्ने” उल्लेख गरिएको छ ।
गाउँपालिकाले व्याट्री, इन्भर्टर वा अन्य विद्युतीय उपकरण प्रयोग गरी नदी, खोल्सा वा जलाशयमा करेन्ट प्रवाह गरेर माछा मार्न पूर्ण रूपमा निषेध गरेको छ ।
नदी तथा खोलामा माछा मार्दा रासायनिक विष वा जडीबुटीजन्य घातक तत्वहरु पानीमा हाल्न नपाइने पनि गाउँपालिकलो प्रष्ट पारेको छ ।
यसबाहेक महाजाल वा साना प्वाल भएका जाल प्रयोग गरी साना भुरा माछासमेत सखाप पार्ने प्रवृत्ति रोक्न प्रविधिको यस्ता दुरुपयोगमा पनि प्रतिबन्ध लगाइएको छ ।
गाउँपालिकाले यसलाई जलचर संरक्षणसँगै दीगो जलस्रोत व्यवस्थापनको दृष्टिले महत्वपूर्ण कदमका रूपमा व्याख्या गरेको छ । “सूचनाको उल्लंघन भएको खण्डमा प्रचलित कानुनअनुसार जरिवाना तथा थप कानुनी कारबाही गरिनेछ,” सूचनामा उल्लेख छ ।
यसका लागि अवैध माछा मार्ने गतिविधि देखे वा थाहा पाए जवाफदेही नागरिकका रूपमा नजिकको प्रहरी चौकी वा गाउँपालिकाको कार्यालयमा खबर गर्न पनि गाउँपालिकाले सर्वसाधारणलाई आग्रह गरेको छ ।
आरुघाट गाउँपालिकाले सबै गाउँपालिकावासीलाई वातावरण संरक्षणमा सहयोग पुर्याउन, जलस्रोत र जलचरको दीगो संरक्षणलाई सामूहिक जिम्मेवारीका रूपमा लिन र अवैध माछा मार्ने क्रियाकलाप विरुद्ध एकजुट हुन अपिल गरेको छ ।