गोरखा । गोरखा सदरमुकाममा रहेको राष्ट्रिय माविका बिद्यार्थीहरुले खाजा खानकालागी तरकारी खेती सुरु गरेका छन् ।
स्कुलमा खाइने दिवा खाजाकोलागी बिद्यार्थी र शिक्षक तथा ब्यवस्थापन समितिका पदाधिकारीहरु मिलेर तरकारी खेती गरिएको बिद्यालय ब्यवस्थापन समितिका अध्यक्ष प्रविन बस्नेतले बताए ।
‘बिद्यालयमा अध्ययनरत सबै बिद्यार्थीहरुलाई खाजाको ब्यवस्था गरेका छौ’ उनले भने ‘सोही खाजाकोलागी सहयोग पुग्ने गरी सबैले तरकारी खेती सुरु गरेका हौ ।’
गोरखा नगरपालिका–३ को घलाङमा रहेको उक्त बिद्यालयमा १०० जना बिद्यार्थीहरु अध्ययनरत छन् । गोरखा नगरपालिका र एक गैर सरकारी संस्थाले ईसिडीदेखी कक्षा ५ सम्मका बिद्यार्थीहरुकोलागी मात्र भएता पनि सबै बिद्यार्थीहरुलाई समान रुपमा खाजा खुवाउने गरेको बिद्यालयका प्रधानाध्यापक माधव तिवारीले बताए ।
‘बिद्यार्थीहरुको खाजाकोलागी हामीलाई प्राप्त हुने पैसाले सबैलाई दिवा खाजाको ब्यबस्था गरेका छौ’ उनले भने ‘सबैलाई खुवाउदा पैसा नपुग्ने भएपछी हामी सबै मिलेर तरकारी खेती गरेका हौ ।’
तरकारी खेतीमा कक्षा ४ देखी १० सम्मका बिद्यार्थी, स्कुलका सबै शिक्षक र ब्यवस्थापन समितिका पदाधिकारीहरु समावेश छन् ।
गत बर्षदेखी सुरु गरिएको तरकारी खेतीलाई यो वर्ष पनि निरन्तरता दिएको प्रअ तिवारीले जानकारी दिए । उनका अनुसार यो बर्ष ४ रोपनी क्षेत्रफलमा कार्डेनल जातको निलो आलु र स्थानिय सेता आलुको खेती गरिसकिएको छ ।
अबको केही दिनमा काउली, बन्दा, मुला र च्याउ खेतीको तयारी भइरहेको पनि उनले बताए । ‘च्याउ खेती गत बर्ष पनि गरेका थियौ’ उनले भने ‘यो बर्ष अझै बढी च्याउ खेती गर्ने गरी तयारी गरेका छौ ।’
बिद्यालयकै कक्षा कोठा प्रयोग गरेर च्याउ खेती गरिन लागेको हो । च्याउ खेतीकालागी बिद्यालयले पराल खरिद गरेर राखिसकेको छ ।
सोही बिद्यालयले गत बर्ष करिब ५२ हजार मूल्य बरावरको च्याउ उत्पादन गरेर बिक्री गरेको विद्यालयको लेखा शाखाले जानकारी दिएको छ ।
