गोरखा । गण्डकी प्रदेशका ८५ स्थानीय तहहरूमध्ये गोरखाको अजिरकोट गाउँपालिका ‘स्वच्छ खाद्यवस्तु उत्पादन प्रवर्धनमार्फत दिगो कृषि तथा खाद्य–पोषण सुरक्षा सुनिश्चित’ गर्ने क्षेत्रमा उत्कृष्ट गाउँपालिका बनेको छ ।
कृषि तथा पशुपन्छी विकास मन्त्रालय, कृषि विभागले ४५औँ विश्व खाद्य दिवसको अवसरमा अजिरकोट गाउँपालिकालाई कदरपत्र प्रदान गरेको गाउँपालिका अध्यक्ष दीपक देवकोटाले जानकारी दिए ।
यो उपलब्धिसँगै अजिरकोट गाउँपालिकाले कृषि तथा खाद्य सुरक्षाको क्षेत्रमा उदाहरणीय पहिचान बनाएको छ । संघीय सरकारका कृषि तथा पशुपन्छी विकासमन्त्री डा.मदन प्रसाद परियारले अजिरकोट गाउँपालिकालाई कदरपत्र प्रदान सम्मान पत्र प्रदान गरेका हुन् ।
स्थानीय सरकार, गाउँपालिका भित्रका कृषक तथा जनप्रतिनिधि, कर्मचारी तथा नागरिकहरूको सामूहिक प्रयासको नतिजा भएको गाउँपालिकाले जनाएको छ । अजिरकोट गाउँपालिकाले अर्गानिक एवं दिगो उत्पादन प्रणालीलाई प्राथमिकतामा राख्दै जैविक खेती, स्थानीय बीउ–बिजनको संरक्षण, र पोषणयुक्त कृषि उत्पादनमा जोड दिँदै आएको छ ।
साथै, गाउँपालिकाले कृषकहरूको क्षमता अभिवृद्धि, कृषि प्रविधिको प्रयोग, र बजार पहुँच विस्तारका लागि पनि विभिन्न कार्यक्रम सञ्चालन गर्दै आएको छ । गाउँपालिका अध्यक्ष देवकोटाले भने “हाम्रो लक्ष्य दिगो विकास, स्वच्छ उत्पादन र समृद्ध अजिरकोट हो ।”
यस उपलब्धिले गाउँपालिकालाई आगामी दिनमा अझ प्रेरित बनाउने विश्वास व्यक्त गरिएको छ । गाउँपालिकाले आगामी दिनमा पनि कृषकमैत्री नीति, सुरक्षित खाद्य प्रणाली, र दिगो विकासका अभियानलाई निरन्तर अघि बढाउने प्रतिबद्धता जनाएको छ ।