गोरखा । जेनजी प्रदर्शन पछी पहिलो पटक गृह जिल्ला आएका डा.बावुराम भट्टराईले आफु पनि यो अन्तरिम सरकार रहेको बताए । प्रदर्शन पछी गोरखा सदरमुकाम आएका उनले यो अन्तरिम सरकारमा आफु अदृष्य रुपमा सहभागी भएको बताएका हुन् ।
नेपाल समाजवादी पार्टी (नयाँ शक्ति) जिल्ला समन्वय समिति गोरखाको आयोजनामा जिल्ला सदरमुकाममा आज आयोजना गरिएको शुभकामना आदानप्रदान कार्यक्रममा बोल्दै डा.भट्टराईले ‘अहिले अन्तरिम सरकार यसो टिको लगाएर बनाएको हो । म पनि त्यसमा छु’ उनले भने ‘अदृष्य मैले धेरै बाहिर भन्नु हुदैन । अरुले धेरै कुरा गर्छन । मैले यो सरकारकोलागी धेरै गरेको छु ।’
बडा दशैं, शुभ दिपावली, नेपाल सम्वत एवं छठ पर्व २०८२ को अवसरमा आयोजित शुभकामना आदानप्रदान कार्यक्रममा बोल्दै उनले अहिले यो सरकार बाहेक अरुको विकल्प समेत नरहेको बताए ।
‘यती बेला वहाँहरुको अरु बिकल्प छैन । त्यसैले हामी सबैले वहाँलाई समर्थन गनुपर्छ’ उनले भने ।
पार्टीका निवर्तमान अध्यक्ष एवं पूर्व प्रधानमन्त्री समेत रहेका डा.भट्टराईले अहिलेको सरकारमा न्यायिक क्षेत्र र प्रशासनिक क्षेत्रबाट आएकाहरुको सहभागिता भएकोले उनीहरुले नियम कानून मिचेर कुनै काम नगर्ने समेत बताए ।
डा.भट्टराईले ‘हामीले वहाँहरुलाई सरसल्लाह दिने हो । त्यसैले वहाँहरुकै नेतृत्वमा नै स्वस्थ्य र निष्पक्ष निर्वाचन गर्न तिर जानु पर्ने’ बताए ।
निर्वाचनमा जानु पूर्व नै जेनजीहरुले बिगतमा उठाएको ३ वटा मागहरुलाई संबोधन गरेर मात्र निर्वाचनमा जानुपर्ने उनको धारणा रहेको थियो ।
डा.भट्टराइेले भाद्र २३ गते सरकारी स्तरबाट नरसंहार मच्चाएको भन्दै त्यसको छानविन तथा २४ गते भएका आगजनीमा घुसपैठ हुनेलाई सत्य तथ्य छानविन गरी आयोगको प्रतिवेदन अनुसार कारवाहीको दायरामा ल्याउनु पर्ने बताए ।
त्यसका साथै डा.भट्टराईले ठूला भ्रष्ट्राचार काण्डहरुको छानविन गरिनु पर्ने र स्वतन्त्र र निष्पक्ष निर्वाचनको निम्ती विदेशमा भएका लाखौ नेपालीहरुलाई मतदानको ब्यवस्था मिलाउनु पर्ने समेत बताए ।
उनले अहिलेको संविधान अनुसार जेनजीहरुलाई उम्मेदवार हुन संविधान बाधक भएकाले संशोधन गरे उम्मेदवारको उमेर हद १८ देखी २१ बर्ष राख्नुपर्ने समेत बताए । संविधानत संसदमा उम्मेदवार हुनकालागि उम्मेदवारको उमेर कम्तीमा पनि २५ बर्ष पुगेको हुनुपर्ने छ ।
शुभकामना दिन लामो समय खर्चिइएका उनले यती गरेर निर्वाचनमा जानु उपयुत्त हुने र त्यसपछी देश अग्र गतीमा जाने ठोकुवा समेत गरे ।
जिल्ला संयोजक नारायण खत्रीको अध्यक्षतामा भएको कार्यक्रममा नेकपा एसका जिल्ला अध्यक्ष यादव बस्नेत, मानव अधिकार संञ्जाल गोरखाका अध्यक्ष यदु अधिकारी, जेष्ठ नागरिक संघ गोरखाका अध्यक्ष मोहनलाल श्रेष्ठ, गोरखा उद्योग बाणिज्य संघका निर्वतनमा अध्यक्ष कृण्णकुमार श्रेष्ठ, गोरखा चेम्बर अफ कमर्शका अध्यक्ष रामस्वरुप श्रेष्ठ, नेपाल पत्रकार महासंघ गोरखाका अध्यक्ष नरेन्द्र ढकालले शुभकामना मन्तब्य राखेका थिए ।