प्रतिकात्मक तस्बिर
गोरखा । जेन–जी आन्दोलनका क्रममा देशको विभिन्न कारागारबाट भागेका १२ जना कैदीलाई गोरखा प्रहरीले पक्राउ गर्न सफल भएको छ । पक्राउ परेका सबै कैदीलाई सम्वन्धित कारागारमा पठाई सकिएको जिल्ला प्रहरी कार्यालय गोरखाका प्रहरी प्रमुख प्रहरी उपरिक्षक भरत बहादुर बिकले जानकारी दिए ।
उनका अनुसार कास्की कारागारबाट भागेका ७ जना बिक्रम नेपाली, तेन्जिङ रिग्देल लामा, छेवाङ रिजिन लामा, सोनाम ग्याल्जेन लामा, बावुराम नेपाली, राजेश विश्व सुनार र सोनाम दोर्जे लामा पक्राउ परेका हुन् ।
उनीहरु सबैलाई केही समय जिल्ला प्रहरी कार्यालय गोरखाको थुनुवा कक्षमा राखेर कानूनी प्रकृया पुरा गरी कास्की कारागार चलान गरिएको पनि उनले बताए ।
त्यस्तैगरी, केन्द्रिय कारागार जगन्नाथ देवलबाट भाग्न सफल भरत ठकुरी, सुमन सुनदास र भुवन तामाङलाई पनि सम्वन्धित कारागार चलान गरिएको छ ।
सोही आन्दोलनका क्रममा भागेर गोरखा आईपुगेका बिशाल उपरकोटीलाई तनहुँ कारागार र सुस्मा मग्रातीलाई बाल सुधार गृह सानो ठिमी भक्तपुर चलान गरिएको पनि प्रहरी उपरिक्षक बिकले जानकारी दिए ।
गोरखामा पक्राउ परेका अधिकांश कैदी गोरखाको र केही ब्यत्ती भने जिल्ला बाहिरको भएको गोरखा प्रहरीले जनाएको छ ।
कारागारबाट भागेका कैदीका बारेमा सूचना संकलन भई रहेको र उनीहरुको घर ठेगानामा सर्च अभियान जारी रहेको पनि प्रहरीले जनाएको छ ।