गोरखा । गाेरखा जिल्ला भित्र रहेकाे सबै सरकारी कार्यालयले दशैंकाे सार्वजनिक विदाका बेला सरकारी सवारी साधनको प्रयोग नपाउने भएका छन् ।
प्रमुख जिल्ला अधिकारी रामुराज कडरियाकाे अध्यक्षतामा आइतबार जिल्ला प्रशासन कार्यालयमा भएकाे कार्यालय प्रमुखहरुकाे बैठकले उक्त निर्णय गरेकाे हाे ।
साेही बैठकले जिल्ला भित्र अबरुद्ध रहेको सबै सडकहरु तत्कालै मर्मत गरेर सुचारु गर्ने, पहिरो गएकाे स्थामा पहिराे हटाउने लगायतका कार्य तत्कालै गर्ने निर्णय भएको छ ।
बैठकले स्थानीय तहहरुसंग आवश्यक समन्वय गरेर चाडबाड मनाउन घर आउने र फर्कने सवै यात्रुहरुलाई असहज हुन नदिन अबरुद्ध सडकखण्ड तत्कालै सूचारु गर्ने निर्णय भएको पनि प्रमुख जिल्ला अधिकारी कडरियाले जानकारी दिए ।
उनका अनुसार दशैंको लामो बिदामा कार्यालय बन्द रहने अवस्थालाई ध्यानमा राख्दै विभिन्न सरकारी कार्यालयमा सुरक्षा व्यवस्थापन मिलाउने र कार्यालयको सुरक्षाका लागि सम्बन्धित कार्यालयले पाले तोक्ने र त्यसको जानकारी जिल्ला प्रशासन कार्यालय तथा जिल्ला प्रहरी कार्यालयलाई गराउने निर्णय भएको छ ।
दशैं बिदाभर कार्यालय प्रमुखहरूले मोबाइल फोनकाे स्विच अफ गर्न नपाउने, अत्यावश्यक कार्यका लागि कर्मचारी तोक्ने, कार्यालयमा विद्युत तथा अन्य सुरक्षाको प्रबन्ध मिलाउने निर्णय समेत भएकाे छ । बिदाकाे दिन सरकारी सवारी साधन प्रयोग गर्नुपर्ने अवस्था आएमा अनिवार्य रूपमा सवारी पास लिनुपर्ने निर्णय समेत बैठकले गरेको उनले बताए ।
साेही बैठकले असोज ६ गते घटस्थापनाको दिनमा समेत सबै सरकारी कार्यालयबाट सेवा प्रवाह गर्ने व्यवस्था मिलाउनुपर्ने निर्णय गरेको छ ।