गोरखा । धार्चे गाउँपालिकाले भाेलीकाे संविधान दिवस विविध कार्यक्रम गरी मनाइने भएको छ । गाउँपालिकाले नेपालको संविधान, २०७२ जारी भएको ऐतिहासिक अवसरलाई सम्मान गर्न संविधान दिवस २०८२ लाई विशेष र भव्य रुपमा मनाउने तयारी गरेको हाे ।
गाउँ कार्यपालिकाको मिति २०८२ भदौ १९ गते बसेको बैठकले असोज २, ३ र ४ गते ३ दिनसम्म विविध कार्यक्रमसहित राष्ट्रिय पर्व मनाउने निर्णय गरेको गाउँपालिकाका अध्यक्ष लक्ष्मण गुरुङले बताए ।
गाउँपालिकाले सम्पूर्ण निकाय र स्थानीय बासिन्दालाई संविधान दिवस अवसरमा आयोजित कार्यक्रमहरुमा संक्रिय सहभागी हुन आह्वान समेत गरेको छ ।
निर्णयअनुसार असोज २ गते बिहान गाउँपालिका कार्यालय, वडा कार्यालय, स्वास्थ्य संस्था र विद्यालयहरुमा राष्ट्रिय झण्डा मर्यादापूर्वक सजाउने र कार्यालय परिसर सफा गर्ने कार्यक्रम छ ।
त्यस्तै असोज २, ३ र ४ गते बेलुकी गाउँपालिका अन्तर्गतका सबै कार्यालय र विद्यालयमा दिप प्रज्वलन गरिनेछ ।
गाउँपालिकाले आम नागरिकलाई पनि आफ्नो घर, टोल तथा सार्वजनिक स्थलको सरसफाइ गरी असोज ३ गते साँझ घर–घरमा दिप प्रज्वलन गर्न आग्रह गरेको छ ।
संविधान दिवसको मुख्य दिन असोज ३ गते बिहान ८ बजे जनप्रतिनिधि, कर्मचारी, राजनीतिक दलका प्रतिनिधि र स्थानीय बासिन्दाको सहभागितामा खोर्लाबेशी र माछिखोला बजार सरसफाइ अभियान सञ्चालन गरिने भएकाे छ। सोही दिन बिहान १० बजे प्रभातफेरीसहित औपचारिक कार्यक्रमका बीच शुभकामना आदानप्रदान गरिने भएकाे छ ।
गाउँपालिकाका प्रशासकीय अधिकृत विनायक तिमिल्सिनाले सम्पूर्ण वडा कार्यालय, सामुदायिक विद्यालय, स्वास्थ्य संस्था तथा गाउँपालिकावासीलाई सक्रिय सहभागिताका साथ कार्यक्रममा सहभागिताका लागि अनुरोध गरेका छन् । “सुन्दर, सुरक्षित, समृद्ध धार्चे” नारासहित आयोजना हुने यस वर्षको संविधान दिवसले समुदायमा राष्ट्रिय एकता, लोकतान्त्रिक मूल्य र संविधानको महत्वबारे सचेतना अभिवृद्धि गर्ने अपेक्षा गरिएको गाउँपालिकाले जनाएको छ ।