गोरखा । गोरखामा ब्यवसाय गर्न चाहने तथा ब्यवसाय गर्दै गरेकाहरुलाई सहुलियतमा ऋण लगानी गर्न गोरखा उद्योग बाणिज्य संघ र एनआईएमबी बैंक बिच आज एक सम्झौता भएको छ ।
सदरमुकाममा भएको एक कार्यक्रममा संघका अध्यक्ष भगवानबावु मास्के र बैंकका गोरखा शाखा प्रमुख मिलन सिंह बस्नेत बिच सम्झौता भएको हो ।
संघले आज पत्रकार सम्मेलन गर्दै सम्झौताको विविध पक्षमा जानकारी गराएको थियो । कार्यक्रममा संघका अध्यक्ष मास्केले संघमा आबद्व भएका ब्यावसायीहरुको हितकोलागि बैंक संग सहुलियत ऋण लगानी गर्ने बारे सम्झौता भएको जानकारी दिए ।
‘सम्झौता बमोजिम अब संघको सिफारीसमा संघमा आबद्व ब्यावसायीहरुलाई बैंकले ऋण लगानी गर्ने छ’ अध्यक्ष मास्केले भने ‘यसले गोरखाका ब्यावसायीहरुलाई ब्यापार ब्यवसाय गर्न अझै सहजता हुने छ ।’
सम्झौता अनुसार संघमा आबद्व ब्यावसायीहरुले बैंकबाट ६ भिन्न प्रकारका सहुलियत ऋण लिन पाउनेछन् । जस अन्तरर्गत ब्यवसाय कर्जा, घर कर्जा, सवारी कर्जा, ब्यक्तिगत कर्जा, शेयर कर्जा र शैक्षिक कर्जा रहेका छन् ।
सम्झौता बमोजिम बैंकले अन्य ऋणीहरुलाई लगानी गरेकोभन्दा संघले सिफारीस गरेका ब्यावसायीहरुलाई ०.५ प्रतिशतदेखी ३ प्रतिशतसम्म सहुलियतमा ऋण लगानी गर्न गर्ने छ ।
कार्यक्रममा एनआईएमबी बैंकका शाखा प्रमुख बस्नेतले सेवा शुल्कमा समेत छुट दिईने गरी सम्झौ भएको बताए ।
गोरखा शाखाले पहिलो पटक संघ संग सम्झौता गरेर ब्यावसायीहरुलाई ऋण लगानी गर्न लागेको हो । यो सम्झौताले गोरखामा ब्यवसाय गर्न चाहेका र गरेकाहरुले पनि लाभ लिन सक्ने उनले बताए ।
प्रमुख बस्नेतका अनुसार विभिन्न शिर्षकमा ५० हजारदेखी २५ करोडसम्म ऋण लगानी गरीने छ । कार्यक्रममा उनले सबै कागजपत्र पुरा गरेको ७ देखी १० दिनमा बैंकले ऋण लगानी गर्ने समेत जानकारी दिए ।
कार्यक्रममा पूर्व अध्यक्षहरु शित्तलकाजी मास्के, ईश्वर काजी मास्के, रामबावु जोशी र निर्वतमान अध्यक्ष कृण्ण कुमार श्रेष्ठ तथा संघका पदाधिकारीहरुको समेतको उपस्थिती रहेको थियो ।