पर्सा । पर्साको वीरगञ्जमा फैलिएकाे हैजाको सङ्क्रमण बढ्दै गएको छ । स्वास्थ्य कार्यालय पर्साका जनस्वास्थ्य कार्यालयका अनुसार अहिलेसम्म ११४ जनामा हैजा पुष्टि भएको हाे ।
झाडापखाला र हैजा पुष्टि भएका १९९ जना बिरामीको विभिन्न अस्पतालमा उपचार भइरहेको स्वास्थ्य कार्यालय पर्साले जनाएको छ ।
अहिलेसम्म वीरगञ्जका विभिन्न अस्पतालमा झाडापखाला लागेर उपचारका लागि भर्ना भएका बिरामीको सङ्ख्या ४२२ पुगेको छ । जसमध्ये उपचार गराएर २२३ जना डिस्चार्ज भएका छन् ।
महानगरपालिकाले हैजा सङ्क्रमणको प्रमुख कारण दूषित खानेपानी हुनसक्ने आशङ्कामा पानीको नमुना सङ्कलन र प्रयोगशालामा परीक्षण प्रक्रियालाई अघि बढाएको छ ।
महानगरको स्वास्थ्य शाखाका अनुसार राष्ट्रिय जनस्वास्थ्य प्रयोगशाला काठमाडाैंमा परीक्षण गरेका बिरामीको दिसाको कुल १० नमुनामध्ये ८ नमुनामा हैजाको सङ्क्रमण पुष्टि भईसकेको छ । २ नुमनाको रिपोर्ट आउन बाँकी छ ।
हैजा फैलिएपछि वीरगन्ज महानगरले मातहतका सबै विद्यालय थप ३ दिन बन्द गरेको छ ।
