गोरखा । गोरखा बजारमा बितरण हुदै आएको खोनेपानीको मूल्य तत्काल नबढाउन खानेपानी तथा सरसफाई बोर्ड गोरखाले निर्देशनात्मक आदेश गरेको छ ।
बोर्डले पृथ्वीनारायण साना सहरी खानेपानी तथा सरसफाई उपभोक्ता संस्थालाई केही दिन अगाडी पत्र पठाएर मूल्य बृद्वि प्रकृया स्थगत गर्न भनेको हो ।
बोर्डको भाद्र ५ गते बसेको बैठकले उपभोक्ता संस्थाले हालसालैदेखी लागु हुन गरी खानेपानीको महसुलमा बृद्वि गरेको बारेमा ब्यापक छलफल पछी तत्कालकोलागि मूल्य नबढाउन निर्देशन दिने निर्णय भएको बोर्डका कार्यकारी अधिकृत बिराज अर्यालले बताए ।
‘पृथ्वीनारायण साना सहरी खानेपानी तथा सरसफाई उपभोक्ता संस्थाले खानेपानीमा मूल्य बृद्वि गराएको बारेमा छलफल भयो’ उनले भने ‘उपभोक्ताहरुको पनि गुनासो आएपछी महशुल बृद्वि प्रकृया स्थगत गर्न पत्राचार गरेका हौ ।’
खानेपानी तथा सरसफाई बोर्डले लेखेकाे पत्र
बोर्डका कार्यकारी अधिकृत अर्यालले हस्ताक्षर गरेर पठाएको पत्रमा ‘उपभोक्ता समितिले हालसालै खानेपानी महसुल बृद्वि गरेको भन्ने सूचना प्राप्त भएको तथा उपभोक्ताहरुको समेत ब्यापक जनगुनासो आएकोले खानेपानी तथा सरसफाई ब्यव्स्थापन बोर्ड, गोरखाको मिति २०८२–०५–०५ गतेको बैठकबाट खानेपानी महसुल बृद्वि स्थगन गर्ने निर्णय भए बमोजिम तत्काललाई महसुल बृद्वि स्थगन गर्न निर्देशन गर्दछु’ भनिएको छ ।
यता पृथ्वीनारायण साना सहरी खानेपानी तथा सरसफाई उपभोक्ता संस्थाका ब्यवस्थापक सुशिल अर्यालले खानेपानी तथा सरसफाई बोर्डले हिजो आइतबार पत्राचार गरी शुल्क नबढाउन भनेको बताए ।
उनका अनुसार बोर्डको पत्र प्राप्त भएकोले केही दिनभित्रै उपभोक्ता संस्थाको बैठक राखेर बढेको मूल्यलाई स्थगन गर्ने तयारी भईरहेको छ ।
०७१ सालदेखी लागु गर्दै आएको मूल्यलाई परिमार्जन गरेर शुल्क बढाएको थियो । संस्थाले गएको असार १५ गते बैठक बसेर भाद्र १ गतेदेखी लागुहुने गरी बढाएको उक्त शुल्क अनुसार ६ युनिटसम्म न्यूनतम ३०० रुपैयाँ, ७ देखी १० सम्म ३५० बाट ४५० रुपैयाँ पुर्याएको छ ।
पृथ्वीनारायण साना सहरी खानेपानी तथा सरसफाई उपभोक्ता संस्थाले खानेपानीमा बढाउने भनेकाे मूल्य सूचि
त्यस्तैगरी, ११ देखी २० सम्म साविकको प्रति यूनिट ७० रुपैयाँबाट बढाएर ८० रुपैयाँ, २० देखी ३० सम्म १२५ बाट बढाएर १५० र ३० युनिटभन्दा माथीकालाई प्रति यूनिट १७५ बाट बढाएर २०० रुपैयाँ पुर्याएको थियो ।
नगर बिकास कोष संग ऋण तिर्न गारो भएपछी उपभोक्ता मार्फत उठाएर तिर्न लागेको संस्थाका एक सदस्यले बताए ।
गोरखा नगरपालिका ६, ७ र ८ नम्बर वडामा बसोबास गर्ने १ हजार ४१० घरका उपभोक्तालाई संस्थाले खानेपानी दिदै आएको छ ।
दैनिक करिब ८ लाख लिटर बितरण गरेको संस्थामा १२ देखी १४ लाख लिटरसम्म पानीको माग हुदै आएको छ ।