गोरखा । गोरखाको ग्रामिण क्षेत्रमा जडान गरिएको ट्रान्सफर्मर चोरी भएको छ । चोरी गरेको आरोपमा प्रहरीले रौतहट गरुडा नगरपालिका–२ का बली सहनीलाई पक्राउ गरेको जिल्ला प्रहरी कार्यालय गोरखाका प्रहरी नायब उपरिक्षक एवं सूचना अधिकारी ईन्द्र प्रसाद सुवेदीले बताए ।
उनका अनुसार भाद्र ८ गते आइतबार साँझ ७ बजेको समयमा सिरानचोक गाउँपालिका–२ को झिम्रेक बनपालेमा रहेको ५० केभीको ट्रान्सफर्मर चोरी गरी त्यस भित्र रहेको तामा र अन्य सामाग्री लैजान लागेको अवस्थामा सहनीलाई पक्राउ गरिएको हो ।
साविक थालाजुङ गाउँ बिकास समितिको घर्तिपानी खनालथोक ग्रामिण बिद्युतिकरण केन्द्रको उक्त ट्रान्सफर्मर फुटाएर सामान झिकेको अवस्थामा फेला परेको पनि सूचना अधिकारी सुवेदीले जानकारी दिए ।
हाल गोरखा नगर पालिका–१० को छेवेटार स्थित कवाड संकलन केन्द्रमा काम गर्ने २८ वर्षे सहनी बिरुद्व उक्त विद्युतिकरण केन्द्रका प्रतिनिधी मार्फत चोरी उद्योग कसूरमा किटानी जाहेरी दर्ता भएको छ ।
सहनीलाई चोरी कसूर शिर्षकमा मुद्वा दर्तागरी भाद्र ९ गते सोमबार गोरखा जिल्ला अदालतबाट ५ दिनको म्यादथप गरी अनुसन्धान सुरु गरिएको गोरखा प्रहरीले जनाएको छ ।
