प्रतिकात्मक तस्बिर
गोरखा । गोरखा घरभई हाल राजधानीको विभिन्न स्थानमा बस्दै आएका २ जना महिलाको कोठाबाट सुनका गरगहना चोरी भएको छ ।
काठमाडौं महानगरपालिका–१६ बालाजु खरिबोट र वडा नम्बर २६ कपुरधारा पोख्रेली टोल डेरा गरी बस्ने २ जना महिलाको कोठाबाट सुनका गरगहना चोरी भएको हो ।
बालाजु खरिबोट बस्दै आएकी २३ वर्षीया पुष्पा थापाको कोठाबाट सुनका विभिन्न गरगहना र नगद समेत गरी करिब ४ लाख ७१ हजार रूपैयाँ बराबरको धनमाल शुक्रबार दिउँसो चोरी भएको प्रहरीले जनाएको छ ।
यसैगरी, कपुरधारा पोख्रेली टोल डेरा गरी बस्दै आएकी २७ वर्षीया लक्ष्मी गुरूङको कोठाबाट सुनका सिक्री १ थान र नगद समेत गरी करिब १ लाख ९५ हजार रूपैयाँ बराबरको धनमाल शुक्रबार दिउँसो चोरी भएको हो ।
प्रहरीले चोरीमा संलग्न हाल फरार व्यक्तिहरूको खोजी गर्नुका साथै यस सम्बन्धमा आवश्यक अनुसन्धान गरिरहेको जनाएको छ ।