काठमाडौं । राष्ट्रपति रामचन्द्र पौडेलले बझाङको बाघ भनेर परिचित नेपाली एमएमए फाइटर रविन्द्र ढाटलाई एक कार्यक्रम बिच सम्मान गरेका छन् ।
भारतमा केही दिन अगाडी भएको म्याट्रिक्स फाइटर नाइट टाइटल विजेता ढाँटलाई राष्ट्रपति भवन शीतल निवासमा सम्मान गरेका हुन् ।
उनले उक्त अवसरमा खेलाडीको भविष्य खेल क्षेत्रमा नै सुरक्षित गर्नेतर्फ सरकारले विशेष ध्यान दिनुपर्ने बताए । राष्ट्रपति पौडेलले देशलाई विश्वभर चिनाउने खेल क्षेत्रको विकास एवम् खेलाडीको सम्मान गर्न सरकारले ध्यान दिनुपर्ने बताएका हुन् ।
राष्ट्रपति पौडेलले व्यक्तिको शारीरिक, मानसिक र समग्र व्यक्तित्व विकासमा खेलको महत्व रहेको बताए । ढाटले आफ्नो खेल कौशल, सामथ्र्य, शक्ति र खेलप्रतिको अगाध समर्पणले यो उपाधि जित्न सफल हुनु नेपालीहरूको लागि गौरवको विषय भएको समेत बताए ।
राष्ट्रपति पौडेलले ढाटको सफलताका लागि सहयोग गर्ने सबैलाई धन्यवाद दिएका छन् ।