प्रतिकात्मक तस्बिर
झापा । लागु औषध कारोबारमा संलग्न १ जना भारतीय नागरिकलाई नियन्त्रणमा लिने क्रममा झापामा प्रहरीले गोली प्रहार गरेको छ ।
गोली लागेका व्यक्ति भारतको किसनगन्ज, कोल्लिकोट थाना क्षेत्र निवासी अन्दाजी ३६ वर्षीय मोहम्मद इस्लाम भएकाे झापा प्रहरीले पुष्टी गरेकाे हाे ।
शनिबार दिउँसो झापाको भद्रपुर नगरपालिका–५ स्थित भित्री सडक खण्डमा शङ्कास्पद अवस्थामा हिँडिरहेका इस्लामलाई प्रहरीले नियन्त्रणमा लिन खोज्दा उनले उल्टै प्रहरीमाथि आक्रमण गर्दै भाग्न प्रयास गरेका थिए ।
सो क्रममा जिल्ला प्रहरी कार्यालय झापा र लागु औषध नियन्त्रण ब्युरो काठमाडौंबाट खटिएको संयुक्त टोलीले २ राउन्ड गोली प्रहार गरेको थियो । १ राउन्ड गोली मोहम्मदको बायाँ खुट्टाको घुँडामुनि लागेको प्रहरीले जनाएको छ ।
लागु औषध ब्युरोका एसएसपी कृष्ण कोइरालाका अनुसार इस्लामको साथबाट करिब १२० ग्राम खैरो हेरोइन बरामद गरिएको छ ।
उनलाई नियन्त्रणमा लिएर थप अनुसन्धान थालिएको र हाल घाइते उनको प्रादेशिक अस्पताल भद्रपुरमा उपचार भइरहेको उनले जानकारी दिए ।
