गुल्मी । रोल्पाको थवाङ गाउँपालिकाका अध्यक्ष ऋषिकेशव बुढा मगरले पालिकाका प्रमुख प्रशासकीय अधिकृत हेमराज घर्तीमगरसहित ७ जना कर्मचारी सम्पर्कविहीन भएको भन्दै बुधबार विज्ञप्ति निकाले लगत्तै बिहीबार उनीहरु गुल्मीमा फेला परेका छन् ।
सामाजिक सञ्जालमा निकै भाइरल भएको उक्त विज्ञप्ति लगत्तै उनीहरुलाई गुल्मीमा फेला पारीएकाे हाे ।
कर्मचारीहरूसँग सम्पर्क नै नभएपछि अपहरण भएको आशंकामा विज्ञप्ति जारी गरेको पालिका अध्यक्षले बताए । पालिकाकै काममा निस्किएका उनीहरु सबैकाे मोबाइल स्विच अफ गरेर बसेपछि अतालिएर आफुले सूचना निकालेको बताए ।
असार २३ गतेसम्म कार्यालयमै रहेका प्रशासकीय अधिकृतलगायत भुक्तानी सहजताका लागि भन्दै रुकुम पूर्व हिँडेपनि २४ गते बिहानदेखि सम्पर्कविहीन भएका थिए ।
सार्वजनिक विज्ञप्तिपछि सम्पर्कविहीन भएका कर्मचारीहरू गुल्मीमा फेला परेको पुष्टि अध्यक्ष स्वयम घर्ती मगरले गरेका हुन् । उनीहरु बिहीबार बिहान ७ बजे फोन सम्पर्क आएका थिए । उनीहरूले सबै आज लिवाङ हुँदै थबाङ फर्कन लागेकाे पनि अध्यक्ष घर्ती मगरले बताए ।
गुल्मी किन गएको भन्नेबारे भने अझै स्पष्ट भइसकेको छैन । प्रमुख प्रशासकीय अधिकृत हेमराज घर्ती मगरसहित सहायक प्रशासन पाँचौँ हरिश माझी, सह–लेखापाल यज्ञप्रसाद कडेल, सव–इन्जिनियर निशा आचार्य र चन्द्र प्रकाश ओलीका साथै अन्य कर्मचारी शिव कुमार वली र प्रदीप केसी सम्पर्कविहीन भएका थिए ।
रातिको समयमा नेपाल टेलिकमको नेटवर्कमा समस्या हुने भएकाले असार २३ गते राति प्रमुख प्रशासकीय अधिकृत घर्ती मगरले कार्यालयको भुक्तानी गर्न ओपीटी कोडको सहजताका लागि रुकुम पूर्वमा गई कामकाज गर्ने निर्णय गरेका थिए ।