गोरखा । गोरखा सदरमुकामका महिलाहरुले घरमा त्यसै खेर गएको मकैंको खोसेल्टाबाट हस्तकलाको विभिन्न सामाग्रीहरु तयार पार्ने तालिम लिएका छन् ।
उप–मेयर सबल नेतृत्व कार्यक्रम अन्तरर्गत गोरखा नगरपालिकाको आर्थिक सहयोग एवं ओंम राजश्री मल्टी एग्रो प्रालि काठमाडौंको प्राविधिक सहयोगमा हस्तकलाका सामाग्री बनाउने तालिम लिएका हुन् ।
३० जना महिला सहभागी भएको उक्त तालिम १ महिना अगाडीदेखी सञ्चालनमा आएको हो ।
गोरखा नगरपालिका–७ को नयाँ बजार क्षेत्रमा भएको उक्त तालिममा टोपी, ब्याग, पूजाथाली, ढकीयाँ तथा गिलास बनाउने सिप सिक्न पाएको स्थानिय सुमित्रा श्रेष्ठले बताईन ।
‘घरमा त्यसै बसी रहेका थियौ’ उनले भनिन् ‘नगरपालिकाको सहयोगमा सिप सिक्न पायौं । अब भने दुई पैसा जोहो गर्न सकिने भयो ।’
सामान्यतया पनि पहाडी क्षेत्रमा पाईने मकैको खोसेल्टा गाई बस्तुलाई खुवाउने वा कुहाएर मल बनाउने गरिन्छ । तर त्यही खेर गएको बस्तुबाट सिप सिक्न पाएकोमा खुशी देखिन्छीन् अर्का महिला बन्दना बसेल ।
‘हामीले दुई पैसाको लागी श्रीमानको अगाडी हात थाप्नुपर्ने थियो’ उनले भनिन् ‘यो सिपले हामीलाई केही पैसा चाहिएको बेला अरु संग हात थाप्नुनपर्ने बनाएको छ ।’
सहभागीहरु महिलाहरुले स्थानिय स्तरबाट प्रति केजी १५० रुपैयाँ हालेर मकैंका खोसेल्टे खरिद गरेर सिप सिक्दै आएका छन् ।
उता गोरखा नगरपालिकाकी उप–मेयर मसली मायाँ थोकर पुनःले महिलाहरुलाई स्थानिय स्रोत र साधन, रोजगारीको सृजनाको प्रमुख आधार मान्दै महिलाहरुलाई आत्मनिर्भर बनाउने उद्वेश्य सहित तालिमको आयोजना गरेको बताईन ।
‘अहिले पनि हाम्रो समाजमा महिलालाई दुई पैसा चाहियो भने अरुको मुख ताक्नु पर्ने अवस्था छ’ उनले भनिन् ‘यो अवस्थाको अन्त्य गर्न पनि यो सिकाईले मद्वत गर्ने छ ।’
तालिममा सहभागि एवं समूह बनाएर मकैंको खोसेल्टाबाट उप्पादिन हस्तकलाहरु बजारीकरण एवं खरिद गर्न ओंम राजश्री मल्टी एग्रो प्रालि तयार रहेको पनि उप–मेयर पुनःले जानकारी दिईन ।