कावासाेती । पूर्वपश्चिम राजमार्गअन्तर्गत नवलपुरकाे दाउन्ने सडक हिलो र चिप्लो भएका कारण गाडी गुड्न समस्या भएकोले बैकल्पिक सडक प्रयाेग गर्न प्रहरीले अनुराेध गरेकाे छ ।
विनयी खोलामा बनाइएको डाइभर्सनमा बाढीले क्षति पुर्याउँदा र ठाउँ–ठाउँमा हिलो भएका कारण समस्या भएको प्रहरीले सूचना नै जारी गर्दै बैकल्पिक सडक प्रयाेग गर्न भनेकाे हाे ।
डाभइर्सनमा क्षति भएसगै दाउन्ने उकालाेकाे विश्वकर्मा मन्दिर, घिउखोलालगायतका ठाउँमा सडक चिप्लो भई गाडी फस्ने र चिप्लिने गरेको छ ।
सडक बिग्रिएकोले जाम र दुर्घटनाको जोखिम भएकोले वैकल्पिक रुटको प्रयोग गर्न जिल्ला प्रहरी कार्यालय पूर्वी नवलपरासी (बर्दघाट सुस्ता पूर्व)ले आग्रह गरेको छ ।
पूर्वबाट पश्चिम जाने गाडी नारायणगढ–मुग्लिन–पोखरा–स्याङ्जा–बुटवल हुँदै र काठमाडाैंबाट पश्चिम जाने गाडी मुग्लिन–पोखरा–स्याङ्जा–बुटवल हुँदै जान प्रहरीको आग्रह छ ।
पश्चिमबाट पूर्व जाने गाडीले बुटवल–स्याङ्जा–पोखरा–मुग्लिन तथा साना गाडीले अवस्था बुझेर कालीगण्डकी करिडोरअन्तर्गत गैँडाकोट–पिपलडाँडा सडकको विकल्प प्रयोग गर्न सक्ने प्रहरीको भनाइ छ ।
