काठमाडौं । लामो विवाद पछी बक्यौता भुक्तानी नगरेका ६ वटा उद्योगको लाइन जोडिएको छ । मगलबार राति नेपाल विद्युत् प्राधिकरणले ती उद्योगमा लाइन जोडिदिएको हो ।
नेपाल विद्युत् प्राधिकरण सञ्चालक समितिको मंगलबार भएको बैठकले ३ महिनाभित्र बक्यौता भुक्तानी नगरे पुनः कारबाही गर्ने निर्णयसहित लाइन जोडिएको हो ।
नयाँ सरकार गठन भएलगत्तै प्रधानमन्त्री केपी शर्मा ओलीले साउन ४ गते सरोकारवालासँग छलफल गर्दै विद्युत् काटिएका उद्योगमा तत्काल जडान गर्न निर्देशन दिएका थिए । प्राधिकरणले डेडिकेटेड फिडर र ट्रंकलाइनको बक्यौता प्रिमियम महसुल नतिर्ने ६ वटा उद्योगमा बिजुलीको लाइन काटेपछि उद्योगी र प्राधिकरणबीच विवाद हुँदै आएको थियो ।
ऊर्जामन्त्रीको अध्यक्षतामा बसेको ८ सदस्यीय सञ्चालक समितिको बैठकबाट भएको निर्णयप्रति २ सदस्यहरु भक्तबहादुर पुन र कपिल आचार्यले असहमति जनाउदै ‘नोट अफ डिसेन्ट’ समेत लेखेका थिए । प्राधिकरणले गएको असार २५ देखि २७ गतेभित्र जगदम्बा स्टिल्स, रिलायन्स स्पिनिङ मिल्स, हुलास स्टिल्स, जगदम्बा सिन्थेटिक्स, अर्घाखाँची सिमेन्ट र घोराही सिमेन्टले विद्युत् महसुलको बक्यौता नतिरेको भन्दै विद्युत् आपूर्ति कटौती गरिदिएको थियो ।
प्राधिकरणका अनुसार जगदम्बा स्टिलको १ अर्ब ६० करोड १८ लाख, रिलायन्सको ७५ करोड ३७ लाख, घोराहीको ५१ करोड, अर्घाखाँचीको ४४ करोड ८६ लाख, जगदम्बा सिन्थेटिक्सको २० करोड र हुलासको १४ करोड रुपैयाँ बक्यौता छ ।
