मकवानपुर । बागमती प्रदेशमा आज बन्ने सरकारको लागि नेपाली कांग्रेस र नेकपा एमालेबीच मन्त्रालय भागबण्डा मिलेको छ । कांग्रेसले मुख्यमन्त्रीसहित ७ र एमालेले ६ वटा मन्त्रालय लिने गरी सहमति भएको हो ।
मुख्यमन्त्रीमा कांग्रेसका बहादुर सिं लामाले सोमबार नै दावी गर्ने भनियता पनि मन्त्रालय भागबण्डा नमिल्दा र एमाले भित्र मन्त्री छनौटको आन्तरिक समस्याले दावी पेश गर्ने पूर्वनिर्धारित कार्यक्रम रोकिएको थियो ।
कांग्रेस संसदीय दलका नेता समेत रहेका लामाले मुख्यमन्त्रीमा आज बिहान ११ बजे दाबी पेश गर्ने कार्यक्रम तय भएको छ । १३ सदस्यीय मन्त्रिपरिषद् रहेको बागमतीमा कांग्रेसले मुख्यमन्त्रीसहित ७ वटा र एमालेले ६ वटा मन्त्रालय लिने सहमती भएको छ ।
सहमती अनुसार कांग्रेसले मुख्यमन्त्रीसँगै आन्तरिक मामिला तथा कानुन मन्त्रालय, भौतिक पूर्वाधार विकास मन्त्रालय र सामाजिक विकास मन्त्रालयसहित संस्कृति, पर्यटन तथा सहकारी, युवा तथा खेलकुद र श्रम रोजगार तथा यातायात मन्त्रालय लिएको छ ।
उता एमालेले आर्थिक मामिला तथा योजना मन्त्रालय, खानेपानी, ऊर्जा तथा सिँचाइ मन्त्रालय, वन तथा वातावरण मन्त्रालय, स्वास्थ्य मन्त्रालय, उद्योग, वाणिज्य, भूमि तथा प्रशासन मन्त्रालय र कृषि तथा पशुपन्छी विकास मन्त्रालय लिने सहमती भएको छ ।
अघिल्ला मुख्यमन्त्री शालिकराम जम्कट्टेलले पदबाट आइतबार राजीनामा दिएपछि प्रदेश प्रमुख यादवचन्द्र शर्माले सोही दिन मंगलबारसम्मको समय दिएर बहुमतको सरकार गठनका लागि आह्वान गरेका थिए ।
