काठमाडौं । नारागणगढ–मुग्लिन सडकखण्डअन्तर्गत चितवनको सिमलतालबाट पहिरासँगै खसेको २ वटा बस र यात्रुको अवस्था पत्ता लाग्न नसकेपछि सरकारले त्यसको खोजीका लागि अन्तर्राष्ट्रिय विज्ञसहितको उद्धार टोली ल्याउन लागेको छ ।
गृह मन्त्रालयको विपद् तथा द्वन्द्व व्यवस्थापन महाशाखाका प्रमुख डा भीष्मकुमार भुसालका अनुसार भारतबाट विज्ञसहतिको उद्धार टोली नेपाल ल्याउन परराष्ट्रमार्फत पत्राचार गरिएको जानकारी दिए ।
घटना घटेकाे ४ दिन बितिसक्दा गाडीको अवस्था पत्ता लाग्न नसकेकाले अन्तर्राष्ट्रिय विज्ञ टोली नै मगाएर खोजी गर्न लागिएको जानकारी उनले दिए । गृह मन्त्रालयका अनुसार अहिले पनि ५०० सरक्षाकर्मी परिचालन गरेर नेपालमा भएका सबै प्रविधिको प्रयोग गरी खोजी जारी छ ।
यही असार २८ गते शुक्रबार वीरगञ्जबाट काठमाडौ आउँदै गरेको बागमती प्रदेश ०३–००६ ख १५१६ नम्बरको एञ्जल डिलक्स र काठमाडौबाट गौर जाँदै गरेको बागमती प्रदेश ०३२४९५ ख ००१ नम्बरको गणपति डिलक्स बस सिमलतालमा खसेको पहिरासँगै बगेर त्रिशूली नदीमा बेपत्ता भएको थियो ।
उक्त बसमा सवार ६५ जनामध्ये ३ जना भने सकुशल निस्कन सफल भएका थिए । हालसम्म पनि बेपत्ता भएका ६२ जना मघ्य १४ जनाकाे शव विभिन्न स्थानमा फेला परेकाे छ । अझै ४८ जना यात्रु र २ वटा बस बेपत्ता छन् ।
