गोरखा । गोरखामा साता दिनमा नै २६७ जनाले कोरोना जित्न सफल भएका छन् । गएको आइतबार अर्थात भाद्र ६ गते ४३७ जना सक्रिय संक्रमित रहेकोमा आज भने घटेर १६९ जना मा रहेको स्वास्थ्य कार्यालय गोरखाले जनाएको छ ।
आज पनि जिल्लाको ३ स्थानिय तहमा ८ जनामा कोरोना संक्रमण देखिएको छ । पीसीआर परिक्षणमा ३ जना एन्टिजेन परिक्षणका क्रममा ५ जनामा संक्रमण देखिएको हो ।
कार्यालयले आज उपलब्ध गराएको रेकर्ड अनुसार प्रदेश स्वास्थ्य निर्देशनालयबाट १३ जना महिला र ८ जना पुरुषको पीसीआर नतिजा प्राप्त हुदा १ जना महिला र २ जना पुरुषमा संक्रमण देखिएको छ ।
त्यस्तै गरी आजै जिल्लाको विभिन्न स्थानिय तहमा ३० जना महिला र ३१ जना पुरुषमा गरिएको एन्टिजेन परिक्षणका क्रममा गोरखा अस्पताल र अजिरकोट गाउँपालिकामा २–२ जना महिला र धार्चे गाउँपालिकामा १ जना पुरुषमा संक्रमण देखिएको छ ।
कार्यालयका अनुसार चुमनुब्री र शहिद लखन गाउँपालिकामा आजको दिनमा कुनै पनि संक्रमित छैनन् । त्यस्तै गरी गण्डकी गाउँपालिकामा १ जना, सिरानचोकमा २ जना, अजिरकोट र बारपाक सुलिकोट गाउँपालिकामा ७–७ जना सक्रिय संक्रमित रहेका छन् ।
त्यस्तै गरी धार्चेमा १३ जना, पालुङटार नगरपालिकामा १७ जना, भिमसेन थापा गाउँपालिकामा ३० जना, गोरखा नगरपालिकामा ४४ जना र आरुघाट गाउँपालिकामा ४७ जना सक्रिय संक्रमत रहेको कार्यालयले जनाएको छ ।
