गोरखा । गोरखा दरमुकाममा नै मोटरसाईकलमा आगजनी गरेको आरोपमा १ जना यूवकलाई आज प्रहरीले नियन्त्रणमा लिएको छ ।
गोरखा नगरपालिका ५ मान्द्रेढुङ्का घर भएको सन्देश पाण्डेले सोही वडाको पश्चिमकाली क्षेत्रमा पार्किङ गरी राखिएको लु २६ प ८७९८ नम्बरको होण्डा कम्पनीको हर्नेट मोटरसाईकलमा आगलागी गरेको आरोपमा गोरखा नगरापालिका ९ का १९ बर्षिय अमृत कमरलाई प्रहरीले बिहीबार पक्राउ गरेको हो ।
घटना विवरण अनुसार बिहीबार दिउसो सदरमुकामको शक्ति माविमा कोरोना बिरुद्वको खोप लगाएर फर्कने क्रममा पाण्डेले पश्चिमकाली मन्दिर क्षेत्रमा पार्किङ गरी साथीहरु संग मन्दिर दर्शन गरेर फर्कने क्रममा एक्कासी मोटर साइकलमा आगलागी भएको देखे पछि प्रहरीलाई खबर गरेका थिए ।
तत्कालै घटना स्थल पुगेका प्रहरीले विभिन्न ब्यक्ति संगको सोधपुछका आधारमा कमरलाई पक्राउ गरिएको जिल्ला प्रहरी कार्यालय गोरखाका प्रहरी नायव उपरिक्षक एवं सूचना अधिकारी प्रकाश दाहालले बताए ।
दाहालका अनुसार कमरलाई भाग्दै गरेको अवस्थामा प्रहरीले नियन्त्रणमा लिन सफल भएको थियो । प्रहरी नियन्त्रणमा रहेका कमरले प्रहरी संगको बयानमा मोटरसाइकल आगजनी गरेको स्विकार गरेको कार्यालयले जनाएको छ ।
कमरले मोटसाइकल जलाएर भाग्ने क्रममा सोही वडाको वडा सदस्यको पसल फोरी केही सामान चोरी गरेको समेत प्रहरीले जानकारी दिएको छ ।
हर्नेट मोटसाइकलको अहिलेको बजार भाउ ३ लाख १० हजार रहेको होण्डा कम्पनीले जनाएको छ ।
तस्बिर जिल्ला प्रहरी कार्यालय गाेरखा