गोरखा । अखिल नेपाल राष्ट्रिय स्वतन्त्र विद्यार्थी युनियन (अनेरास्ववियू) गोरखाले पेट्रोलियम पदार्थमा गरेको मूल्यवृद्धि फिर्ता लिन माग गर्दै प्रमुख जिल्ला अधिकारी मार्फत नेपाल आयल निगमको ध्यानकर्षण गराएको छ ।
अनेरास्ववियूका जिल्ला संयोजक सुजन सिंखडाको नेतृत्वको टोलीले प्रमुख जिल्ला अधिकारी शालिकग्राम शर्मा पौडेल मार्फत आयल निगमको ध्यानकर्षण गराएको हो ।
ध्यानकर्षण पत्रमा कोरोना भाइरसको महामारी र त्यसको प्रत्यक्ष असरबाट प्रभावित उपभोक्तालाई थप पिडा दिने निगमले पेट्रोलियम पर्दाथको मूल्य बृद्धि गरेको भन्दै स्वचालित मूल्य प्रणालीको हवाला दिइएपनि कालोबजारी र चुहावट नियन्त्रण, सङ्कटको समयमा प्रयोग गर्न मिल्ने मूल्य स्थिरीकरण कोषमा सञ्चित रकमको उपयोग, अनावश्यक करहरुको शिर्षक कटौती तर्फ नेपाल आयल निगमले कुनै पहल नगरी निगमले मूल्य बढाएको भनिएको छ ।
नयाँ मूल्यअनुसार अब पेट्रोल प्रतिलिटर रु १३०, डिजल र मट्टीतेल प्रतिलिटर रु ११३ पुगेको छ । यसअघि पेट्रोल प्रतिलिटर रु १२८, डिजल र मट्टीतेल प्रतिलिटर रु १११ मा बिक्री हुँदै आएको थियो ।
निगमले खाना पकाउने एलपी ग्यासमा प्रतिसिलिण्डर रु २५ ले वृद्धि गरेको छ । यसअघि प्रतिसिलिण्डर रु १ हजार ४२५ मा कारोबार हुँदै आएको ग्यास अब रु १ हजार ४५० पुगेको छ ।
आन्तरिकतर्फको हवाई इन्धनको मूल्यसमेत प्रतिलिटर रु २ रुपैयाँले वृद्धि भई रु ८६ पुगेको छ । अन्तर्राष्ट्रिय हवाई इन्धनतर्फ प्रतिकिलो १६ डलरले वृद्धि गरी ७७० अमेरिकी डलर कायम गरिएको निगमले जनाएको छ ।
मूल्य बढाउँदा पनि पेट्रोलमा प्रतिलिटर ८ रुपैयाँ ४२ पैसा, डिजलमा प्रतिलिटर २ रुपैयाँ ६४ पैसा र ग्यासमा प्रतिसिलिण्डर ४२० रुपैयाँ ७५ पैसा घाटा रहेको निगमले जनाएको छ ।
