गोरखा । गोरखाको सिरानचोक गाउँपालिका पहिरोमा परि ज्यान गुमाएका परिवारलाई आर्थिक सहयोग उपलब्ध गराइएको छ ।
सिरानचोक गाउँपालिका ७ को उपल्लो गोहोरेमा गएको जेठ १८ गतेराती घरमाथि बाट खसेको पहिरोले पुरिएर ज्यान गुमाएका रमन प्रसाद पाण्डे र नन्द कुमारी पाण्डेको परिवारलाई ५० हजार रुपैया आर्थिक सहयोग उपलब्ध गराईएको हो ।
काग्रेस केन्द्रिय सदस्य मोहनबहादुर बस्नेतको पहलमा शनिबार तनहुँको दमौलीमा गोरखाका र तनहुँका पहिरो पिडितलाई आर्थिक सहयोग गरिएको नेपाली काँग्रेस तनहुँका सचिव बिश्व बास्तोलाले जानकारी दिए ।
पहिरोमा परि मृत्यु भएका परिवारलाई पूर्वमन्त्री समेत रहेका बस्नेत र जिल्ला समन्वय समिति तनहुँका प्रमुख शान्तिरमण वाग्लेले सहयोग रकम हस्तान्तरण गरेका थिए ।
त्यस्तै पहिरोमा परि ज्यान गुमाउने व्यासनगरपालिका–१ निर्मलबस्ती निवासी सरस्वती घर्ती,बन्दिपुर गाउँपालिका–३ तामुङका सरस्वती थापा र हरिमाया सार्की, ऋषिङ गाउँपालिका–७ की देवीसरा थापा,वडा नं ८ का खुमबहादुर आलेको परिवारलाई आर्थिक सहयोग गरिएको छ ।
उनीहरुको परिवारलाई प्रतिपरिवार २५ हजारका दरले आर्थिक सहयोग उपलब्ध गराईएको छ ।