गोरखा । उत्तरी गोरखामा बाढीले बगाएको यारु बगरको गोरेटो बाटो मर्मत पछि आजबाट सुचारु गरिएको छ ।
असार १६ गते बुढी गण्डकी नदीमा आएको बाढीले गोरेटो बाटो बगाए पछि बाटो अबरुद्व हुदै आएको थियो ।
मनास्लु जाने मुख्य पदमार्गमा रहेको यारु बगरको बाटो ४५ दिन पछि सञ्चालनमा आएको चुमनुब्री गाउँपालिका ३ का वडाध्यक्ष रामकुमार गुरुङले बताए । ‘असार १६ गते आएको बाढीले बगाए पछि आवतजावतमा समस्या भएको र बैकल्पीक मार्ग प्रयोग गर्दै आएको’ भन्दै वडाध्यक्ष गुरुङले ‘लामो प्रयास पछी आजबाट बाटो सुचारु गर्न सफल भएको’ बताए ।
यारु बगरको गोरेटो बाटो नदीमा आएको बाढीले बगाए पछि सर्व साधारणले जोखिम मोलेर जंगल तथा भिरको बैकल्पीक बाटो प्रयोग गर्दै आएका थिए । १५ मिनेटमा पार गर्ने बाटो बैकल्पीक मार्ग प्रयोग गर्दा २ घण्टा सम्म लाग्ने गरेको थियो ।
धार्चे र चुमनुब्रीको सिमा रहेको यारु बगरमा दुवै गाउँपालिकाले साझेदारीमा बाटो निर्माण गरेको धार्चे गाउँपालिका वडा नम्बर १ का वडाध्यक्ष दिलिप गुरुङले बताए । ‘डेड महिना देखी बाटो अबरुद्व भएको’ भन्दै वडाध्यक्ष गुरुङले ‘दुवै गाउँपालिकाले साझेदारीमा बाटो निर्माण सम्पन्न गरेको’ बताए ।
बाटो मर्मतको यंकिन खर्च आउन बाँकी नै रहेको भन्दै १० लाख रुपैयाँ जति खर्च भएको अनुमान गरिएको चुमनुब्री गाउँपालिकाका प्रमुख प्रशासकिय अधिकृत भिमसेन श्रेष्ठले जानकारी दिए ।
नदीले बाटो बगाए पछि उत्तरी क्षेत्रको साविकका सिर्दीबास, चुम्चेत, छेकम्पार, बिही, ल्हो, प्रोक र सामागाउँका सर्व साधारणहरुले दैनिक उपभोग्य बस्तु पनि हेली मार्फत चार्टर गरेर ल्याउन बाध्य भएका थिए ।
सडक मार्गले छुन नसकेको उत्त स्थानको ढुवानीको मुख्य साधान भनेकै खच्चड हो । खच्चड समेत आउजाउ गर्न नसक्ने भए पछि गाउँले सबै मिलेर हेली चार्टर गरेर सामान ल्याउने गरेको एक स्थानियले बताए ।
बाटोको मर्मत कार्य सम्पन्न भए संगै अब खच्चडले सामान ढुवानी गर्न सहज हुने र सामान सर्व सुलभ रुपमा पाउन सकिने भन्दै उत्तरी गोरखाका स्थानिय खुशी भएका छन् ।
तस्बिर रामकुमार गुरुङ