फाईल तस्बिर
गोरखा । गोरखा जिल्लाको विभिन्न स्थानमा ९४ हजार भन्दा बढी गाँजाको बोट नष्ट गरिएको छ ।
नेपाल प्रहरी र सामुदायिक सेवा केन्द्रको संयुत्त पहलमा जिल्ला भित्रको विभिन्न सस्थानमा रहेको ९४ हजार ६३० बोट गाँजा नष्ट गरिएको हो ।
लागू औषध नियन्त्रणको अभियानका क्रममा केन्द्रले प्रहरी संगको सहकार्यमा गएको आर्थिक बर्षमा गाँजाको बोट नष्ट गरेको जिल्ला प्रहरी कार्यालय गोरखाले जनाएको छ ।
जिल्ला प्रहरी कार्यालय गोरखाका प्रहरी नायब उपरीक्षक एवं सूचना अधिकारी प्रकाश दाहालका अनुसार जिल्लाको बिभिन्न स्थानमा प्राकृतिक रुपमा उम्रिएका तथा खानकालागी घरबारीमा लगाईएका गाँजा फडानी गरिएको हो ।
सबै भन्दा धेरै गाँजा फडानी गोरखा नगरपालिकामा गरिएको छ । जहाँ ४६ हजार २०० गाँजाको बोट नष्ट गरिएको थियो ।
त्यस्तै गण्डकी गाउँपालिकामा ४२ हजार १० वटा बोट, पालुङटार नगरपालिकामा १ हजार ८५० बोट, बारपाक सलिकोट गाउँपालिकामा ९६० बोट गाँजा नष्ट गरिएको थियो ।
उता सहिद लखन गाउँपालिकामा ९०० बोट र अजिरकोट गाउँपालिका भच्चेकमा ७८० बोट गाँजा नष्ट गरेकोे प्रहरीले जनाएको छ ।
गाँजा फडानीमा सक्रिय रहेको गोरखा प्रहरीले चालु आर्थिक बर्षको पहिलो १ महिनामा मात्रै पनि ९ स्थानमा रहेको करिब २ हजार गाँजाको बोट नष्ट गरिसकेको छ ।
