मास्क प्रयोग गरेर हिडेको बटुवालाई धन्यबाद दिदै प्रजिअ शालिग्राम शर्मा पौडेल
गोरखा । गोरखा बजारमा बिना मास्क हिडडुल गर्ने ८२ जनालाई प्रहरीले नियन्त्रणमा लिएर कारवाही गरेको छ ।
जिल्ला भित्र कोरोना संक्रमण तिव्र रुपमा फैलिरहेका बेलामा समेत सार्वजनिक स्थलमा हिडडुल गर्दा मास्क नलगाउने ८२ जनालाई प्रहरीले पक्राउ गरी जिल्ला प्रशासन कार्यालयमा बुझाएको हो ।
पक्राउ गरी प्रशासनमा बुझाएका सबैलाई अब आइन्दा मास्क लगाएर मात्र हिड्ने शर्तमा जनही १०० रुपैयाँ जरिवाना गरेर छाडीएको प्रशासन कार्यालय गोरखाले जनाएको छ ।
सदरमुकाम सहितका बजार क्षेत्रमा ‘तपाई को मास्क खोई’ अभियान सुरु गरेको प्रहरीले बिभिन्न सचेतना कार्यक्रम सञ्चालन भइरहदा समेत मास्क नलगाई घर बाहिर सार्वजनिक स्थलमा निस्कने व्यक्तिहरुलाई पक्राउ गरि कारवाही गर्न थालेको जिल्ला प्रहरी कार्यालय गोरखामा प्रहरी उपरिक्षक शेखर खनालले बताए ।
कोरोना संक्रमण रोकथामका लागि प्रहरी सामुदायिक सेवा केन्द्र संगको सहकार्यमा सचेतना मूलक अडियो जिंगल बजाउने, माईकिङ गर्ने लगायतका कार्य दिनहुँ जसो गरिरहेको छ तर पनि बजार तथा भिडभाडमा आउजाउ गर्नेहरुले मास्क प्रयोग गर्न आनाकानी गर्ने गरेकोले उनीहरुलाई नियन्त्रणमा लिएर कारवाहीकालागी प्रशासनमा बुझाउन थालिएको प्रहरी नायव उपरिक्षक एवं सूचना अधिकारी प्रकाश दाहालले बताए ।
पक्राउ परेका सबैलाई स्वास्थ्य मापदण्डको उलंग्घन गरेको भन्दै कोभिड १९ संकट व्यवस्थापन अध्यादेश, २०७८ बमोजिम प्रति व्यक्ति १०० जरिवाना गरेर मास्क लगाउने शर्तमा मात्र छाड्ने गरिएको छ ।
जिल्लामा पछिल्लो समय संक्रमण दर उच्च हुदै गएकोले स्वास्थ्य मापदण्डको उल्लंघन गर्नेहरु जो कोहीलाई पनि प्रहरीले नियन्त्रणमा लिन थालेको हो ।
गोरखा प्रहरी र सामुदायिक सेवा केन्द्र गोरखाले नागरिकहरुलाई अनिबार्य मास्क लगाएर मात्र हिडडुल गर्न आग्रह गर्दैै यही साउन १८ गतेदेखि तपाईको मास्क खोई अभियान सञ्चालन गर्दै आइरहेको छ ।
जिल्ला प्रहरी कार्यालय गोरखा र सामुदायिक सेवा केन्द्र गोरखाले घर बाहिर निस्कदा अनिबार्य रुपमा मास्क प्रयोग गरेर मात्र हिड्न सर्व साधारण सवैलाई अपिल गरेको छ ।
स्वास्थ्य मापदण्डको पालना नगर्ने २५ सवारी साधनलाई पनि ५०० रुपैयाका दरले जरिवाना गरिएको छ ।