गोरखा । गोरखा नगरपालिकामा कार्यरत कर्मचारीहरुमा कोरोना संक्रमण देखिन थाले पछि कार्यालय बन्द गरिएको छ ।
नगरपालिकाले आज एक सूचना जारी गर्दै ५ जना कर्मचारीमा कोरोना पुष्टी भएको र अन्य थप ६ जना कर्मचारीमा लक्ष्यण देखिएकोले अर्को सूचना जारी नहुदा सम्मकोलागी कार्यालय बन्द गरिएको जनाएको हो ।
प्रमुख प्रशासकिय अधिकृत दिनेशराज पन्तद्वारा जारी सूचनामा ‘कार्यालयमा कार्यरत ५ जना कर्मचारी कोरोना भाइरस कोभिड–१९ पोजेटिभ भई आइसोलेशनमा रहेको र अन्य थप ६ जना कर्मचारीहरुमा समेत कोरोना भाइरसको लक्षणहरु देखिइ पीसीआर परिक्षणको नतिजामा रहेका कारण कार्यालयबाट नियमित सेवा प्रवाह गर्दा अन्य बाँकी कर्मचारी र सेवाग्राहीहरुमा समेत कोरोना संक्रमण फैलिन सक्ने विषम परिस्थितीमा यस कार्यालयबाट प्रवाह हुदै आएको सेवा प्रभावित हुने भएकोले मिति २०७८÷०४÷२५ देखि अर्को सूचना जारी नहुँदासम्मकोलागी नगरपालिका कार्यालयलबाट प्रवाह हुने अत्यावश्यक सेवा बाहेकका सेवाहरु बन्द रहने’ भन्दै ‘वडा कार्यालयहरु र स्वास्थ्य संस्थाहरुबाट भने नियमित सेवा सुचारु रहने’ भनिएको छ ।
खुकुलो निषेधाज्ञा संगै गोरखाको धेरै जसो स्थानिय तहमा पछिल्लो साता देखी कोरोना संक्रमण झनै बढ्दो अवस्थामा पुगेको छ ।
