गोरखा । नोबल कोरोना भाइरस (कोभिड–१९)बाट जिल्लामा संक्रमितहरुको दर बढे संगै शुक्रबार साँझ सम्म सक्रिय संक्रमितको संख्या ७३७ पुगेको छ ।
शुक्रबार जिल्लाको विभिन्न स्थानिय तहमा गरिएको एन्टिजेन परिक्षण र प्रयोगशालाबाट प्राप्त पीसीआर परिक्षणको नतिजा अनुसार ७७ जनामा संक्रमण भएको स्वास्थ्य कार्यालय गोरखाले जनाएको छ ।
शुक्रबार पीसीआर तर्फ ४५ जना र एन्टिजेन परिक्षणमा ३२ जनामा संक्रमण देखिएको हो । संक्रमित मध्ये पीसीआरको नजितामा २२ जना महिला र २३ जना पुरुष तथा एन्टिजेन गर्दा १६–१६ जना महिला र पुरुषमा संक्रमण देखिएको छ । यसलाई हेर्दा जिल्लामा ३८ जना महिला र ३९ जना पुरुषमा संक्रमण भएको देखिन्छ ।
संक्रमण देखिएका मध्ये पीसीआर नजिता प्राप्त भएको गोरखा नगरपालिकामा १६ जना महिला र १९ जना पुरुष र भिमसेन थापा गाउँपालिकामा ६ जना महिला र ४ जना पुरुषमा संक्रमण देखिएको छ ।
यता एन्टिजेन प्रविधी मार्फत गरिएको परिक्षणमा गोरखा अस्पतालमा ७ जना महिला र ३ जना पुरुष, आरुघाट र अजिकोट गाउँपालिकामा १–१ जना पुरुष र महिला तथा सिरानचोक गाउँपालिकामा १ जना महिला र ४ जना पुरुषमा संक्रमण देखिएको छ ।
उता उत्तरी गोरखामा पहिलो पटक ठुलो संख्यामा कोरोना संक्रमित फेला परेका छन् । हिमाल पारीको जिल्ला समेत भनेर चिन्न सकिने चुमनुब्री गाउँपालिकामा पहिलो पटक १५ जनामा एकै साथ संक्रमण देखिएको हो ।
बिगतमा कहिलेकाही १-२ जनामा संक्रमण देखिएको भएता पनि यति ठुलो संख्यामा संक्रमण देखिएको यो नै पहिलो पटक भएको गाउँपालिकाका प्रमुख प्रशासकिय अधिकृत भिमसेन श्रेष्ठले बताए ।
संक्रमण देखिएका ७ जना महिला र ८ जना पुरुष चुमनुब्री गाउँपालिका ७ को छेकम्पारका भएको पालिकाका स्वास्थ्य शाखा प्रमुख प्रेम गुरुङले बताए ।
शुक्रबार ६८–८६ जना महिला पुरुषका पीसीआरको नतिजा प्राप्त भएको र थप ३१ जनाको पीसीआर संकलन गरिएको कार्यालयले जनाएको छ । शुक्रबार एन्टिजेन भने ११२ जनामा गरिएको थियो ।