गाेरखा सदरमुकाममा रहेकाे बिद्युत सव स्टेशन र समस्या आएकाे ट्रान्सर्फमर
गोरखा । गोरखा सदरमुकाममा रहेको बिद्युत प्रशारण केन्द्रमा रहेको मुख्य ट्रान्सर्फमरमा समस्या आए संगै ११ केभिएको लाईन सञ्चालनको तयारी थालिएको छ ।
शनिबार बिहान अकस्मात केन्द्रमा रहेको ६/८ को ट्रान्सर्फरमा समस्या आए पछि नयाँ मेशिन नराख्दा सम्मकोलागि तनहुँको आँबुखैरेनी देखी गोरखा सदरमुकाम सम्म रहेका प्रशारण केन्द्रमा ११ केभिएको लाईन सञ्चालन गरी बिद्युत सुचारु गर्नलागिएको प्रशारण केन्द्र गोरखाका प्रमुख नेत्रमणी न्यौपानेले बताए ।
सदरमुकाम र वरपर बिद्युत अबरुद्व भए संगै गोरखा बजार र आसपासका क्षेत्रमा पानी, ईन्टरनेट, रेडियो, पत्रपत्रिका तथा मोबाईल नेटर्वकमा समस्या देखिन थालेको छ ।
सदरमुकामबाट सञ्चालित रेडियो गोरखा, च्वाईस एफएम, रेडियो मनास्लु र रेडियो मातृभूमीको प्रशारण बन्द भएको छ भने दरौदी, सुरुवात र गोरखा समाचार दैनिक पत्रिका प्रकाशन बन्द भएको छ ।
त्यस्तै गरी गोरखा बजार तथा आसपासमा लिफ्टीङ प्रविधीमा आधारीत सबै खानेपानी सेवा प्रभावित भएको छ ।
यता गोरखा बजार क्षेत्रमा रहेको प्राय सबै मोबाईल नेटर्वक कमजोर देखिन थालेको छ । आज आइतबार भएको कारण बिद्युत सुचारु हुन नसकेको खण्डमा सरकारी काम लिएर आउने सबै जना प्रभावित हुने निश्चित छ ।
तनहुँको आँबुखैरेनी देखी गोरखा सदरमुकाम सम्म आएको ३३ केभिए लाईनलाई आँबुखैरेनीकै सव स्टेशनमा ११ केभिएमा परिवर्तन गर्न प्राविधिकहरु बिहानै देखी काममा लागेको पनि गोरखा प्रशारण केन्द्रका प्रमुख न्यौपानले बताए ।
न्यौपानेका अनुसार गोरखा सदरमुकाममा रहेको प्रशारण केन्द्र र तनहुँको आँबुखैरेनीमा रहेको सव स्टेशनमा प्राविधीकहरुले ३३ केभिएको लाईनलाई ११ केभिएमा परिवर्तन गरिरहेको र काम सफल भएको खण्डमा बिहान ११ बजे सम्म गोरखा सदरमुकाममा लाइन सञ्चालन हुने छ ।
