काठमाण्डौं । तात्कालीन सरकार–माओवादी १० वर्षे द्वन्द्वमा बेपत्ता भएका गोरखा नारेश्वरका १ जना पूरुष सहित ३१ व्यक्ति सकुशल अवस्थामा परिवारको सम्पर्कमा आएका छन् ।
बेपत्ता पारिएका व्यक्तिको छानबिन आयोगले उजुरीको छानबिनका लागि पीडितको परिवारलाई भेट्ने क्रममा ती व्यक्ति परिवारसँग सकुशल अवस्थामा रहेको पाइएको हो । गोरखा जिल्ला साविकको नारेश्वर गाउँ बिकास समिति ६ का राजुविक्रम शाह फेला परेको अयोगका अध्यक्ष युवराज सुवेदीले जानकारी दिए ।
बेपत्ता व्यक्तिको परिवारसँग भेट्ने क्रममा ३१ व्यक्ति सम्पर्कमा आएका छन्, परिवारसँग सकुशल भेटिएका हुन्, आयोगका अध्यक्ष सुवेदीले भने, अध्ययन गर्दै जाँदा भेट्ने क्रम जारी छ, अरु पनि भेटिन्छन् भन्ने आयोगको विश्वास छ।
आयोगले उजुरीको अध्ययन गरी छानबिन गर्न जाने क्रममा हालसम्म भेटिएका बेपत्ता व्यक्तिमा नुवाकोट विदुर नगरपालिका १२ का लछुमनप्रसाद भट्ट, स्याङ्जा वालिङ नगरपालिका ६ का गोपालप्रसाद अर्याल, कैलाली घोडाघोडी नगरपालिका १३ का हेमराज जोशी, कञ्चनपुर पुनर्वास नगरपालिका १० का कृष्णप्रसाद दुलाल र इलाम माईनगरपालिका ७ का चन्द्रबहादुर शाह रहेका छन् ।
त्यस्तै‚ झापा कमल गाउँपालिका १ का भीष्मजङ्ग रायमाझी, चितवन भरतपुर उपमहानगरपालिका १३ का गङ्गाधर तिमिल्सिना, रुकुमपश्चिम सानीभेरी गाउँपालिका ११ का उमेश विक, दार्चुला नौगाड गाउँपालिका ५ का विक्रमसिंह ठगुन्ना, ओखलढुङ्गा सिद्धिचरण नगरपालिका २ का रोहित भट्टराई, डडेलधुरा परशुराम नगरपालिका ९ का कालुसिंह ठगुन्ना, नवलपरासी (बर्दघाटसुस्ता पश्चिम) रामग्राम नगरपालिका १५ का केशवप्रसाद उपाध्याय पौडेल पनि फेला परेका छन् ।
फेला परेका अन्य व्यक्तिहरुमा मोरङ मिक्लाजुड गाउँपालिका ३ का कुमार सुवेदी, ललितपुर गोदावरी नगरपालिका १३ का राजकुमार राना, कञ्चनपुर भीमदत्त नगरपालिका १८ का धनबहादुर दाहाल, बाजुरा खप्तड छेडेदह गाउँपालिका २ का डबल बुढा र तनहुँ म्याग्दे गाउँपालिका १ का शिवप्रसाद खनाल रहेका छन् ।
त्यस्तै‚ भोजपुर नगरपालिका ३ का रामकुमार राई, भोजपुर रामप्रसाद राई गाउँपालिका ३ का बबिन राई, संखुवासभा चैनपुर ११ का जगनाथ हेडवा र लक्ष्मीबहादुर बुढा, डोटी शिखर नगरपालिकाका जनक भण्डारी, चितवन रत्ननगर नगरपालिकाका बेनीमाया अधिकारी र रौतहट गौर नगरपालिका १ का सन्तोष जैसवाल परिवारसँग सकुशल भेएिका हुन् ।
त्यस्तै‚ दैलेख नारायण नगरपालिका ६ का जयाप्रसाद जैशी, स्याङ्जा पुतलीबजार नगरपालिका २ का टुकबहादुर पौडेल, सल्यान कालिमाटी गाउँपालिका १ का पहलमान बस्नेत, ताप्लेजुङ मिक्वाखोला गाउँपालिका १ का नीलबहादुर थापा र सर्लाही बसबरिया गाउँपालिका ३ का हरिमोहन चौधरी परिवारको साथमा भेटिका हुन् ।
नेपालमा २०५२ फागुन १ देखि २०६३ मंसिर ५ सम्म चलेको सशस्त्र द्वन्द्वका क्रममा व्यक्ति बेपत्ता पारिएको भनेर आयोगमा उजुरी परेको थियो । सोही उजुरीको अध्ययन गर्ने क्रममा ३१ व्यक्ति फेला पारी हाल परिवारको सम्पर्कमा रहेका छन् । आयोगमा परेका ३ हजार २२३ उजुरीमध्ये २३७ उजुरी सत्य निरुपण तथा मेलमिलाप आयोगसँग सम्बन्धित भएकाले त्यहाँ पठाएको छ । त्यसमध्ये १३१ उजुरी दोहोरो परेको देखिएकाले लगतकट्टा गरिएको र २८९ उजुरीमा सशस्त्र द्वन्द्वका क्रममा व्यक्ति बेपत्ता पारेका भन्ने नै आधार प्रमाण नदेखिएकाले तामेलीमा राखिएको छ ।
आयोगले २ हजार ४९५ उजुरीमा विस्तृत छानबिन गरिरहेको छ ।
