गोरखा – गोरखाको सबै स्थानिय तहमा २६ औं जनयुद्ध दिवस मनाइएको छ । तत्कालिन नेकपा माओबादीले २०५२ साल फागनु १ गते जनयुद्धको सुरुवात गरेको ऐतिहासिक दिनको सम्झनामा नेपाल कम्युनिष्ट पार्टी (नेकपा) दाहाल–नेपाल समूहले जिल्लाको ११ वटै स्थानिय तहमा कार्यक्रम गरेको हो ।
नेकपा गोरखा नगरपार्टीको आयोजनामा भएको कार्यक्रममा गण्डकी प्रदेश कमिटिका अध्यक्ष हितराज पाण्डे अहिलेका सवैखालका उपलब्धी जनयुद्धको प्रतिफल भएको बताए । उनले जनयुद्ध नेपाली राजनीति मात्र नभएर बिश्व राजनीतिक आन्दोलनको नमुना भएको भन्दै जनयुद्धबाट प्राप्त उपलब्धीलाई कसैले खोस्न नसक्ने बताए ।
जनयुद्ध दिवसको अबसरमा जिल्लाको गण्डकी गाउँपालिकामा भएको कार्यक्रममा नेकपाका केन्द्रीय सदस्य हरिराज अधिकारीले प्रधानमन्त्री केपी शर्मा ओलीले गरेको संबिधान उल्लंघनको जनताले रक्षा गर्ने अबस्थामा पुगेको बताए । उनले संबिधानमा हुदै नभएको अधिकारको प्रयोग गरेर ओलीले संसद बिघटन गरेपनि लाखौ जनता त्यसको बिरुद्धमा सडकमा उत्रिए पछि सरकार अत्तालिएको समेत बताए ।
त्यस्तै गरी आरुघाट गाउँपालिकामा आयोजित कार्यक्रममा बोल्दै पार्टीका केन्द्रीय सदस्य एवंम गोरखा जिल्लाका अध्यक्ष लेखबहादुर थापाले जनयुद्धलाई धारे हात लगाउने ओलीले अहिले माओबादी नेताहरुलाई आफ्नो पक्षमा ल्याउन झुटको खेती गर्दै हिडेको आरोप लगाए । उनले ओलीले सत्तामा पुग्नका लागि मात्र पार्टी एकता गरेको भन्दै जनताले ओलीको सबै ब्यवहार बुझी सकेको बताए ।
सिरानचोक गाउँपालिकामा आयोजित कार्यक्रममा पार्टीका जिल्ला इन्चार्ज कृष्ण धितालले जनयुद्धले एजेण्डालाई स्थापित गर्ने अबस्थामा राजनीति पुगेको भएपनि प्रधानमन्त्री केपी शर्मा ओली धोका दिएको आरोप लगाए ।
उता भीमसेन थापा गाउँपालिकामा पार्टीका केन्द्रीय सदस्य सुशिला सिंखडा, शहिद लखन गाउँपालिकामा केन्द्रीय सदस्य अमर तमु, बारपाक सुलिकोट गाउँपालिकामा पार्टीका गण्डकी प्रदेश कमिटिका सदस्य बिष्णु भट्ट, पालुङ्गटार नगरपालिकामा गण्डकी प्रदेश कमिटिका कार्यालय सदस्य हितबहादुर कंडेल, धार्चेमा गाउँपालिकामा नेता छमबहादुर गुरुङ्ग लगायतका नेताहरुले सम्बोधन गरेको नेकपा गोरखाले जनाएको छ ।
